Andijon viloyatida kriminogen vaziyati ogʻir mahallalarda amalga oshirilayotgan ishlar boʻyicha tanqidiy muhokama yigʻilishi oʻtkazildi
2025-08-20 19:35:00 / Yangiliklar
Oʻzbekiston Respublikasi Prezidentining 2025-yil 3-yanvardagi PQ-1-son Qarorida belgilab berilgan vazifalardan kelib chiqib, Andijon viloyati prokurori Murodillo Abduhakimov hamda viloyat IIB boshligʻi Sanjar Djabarovlar raisligida viloyatdagi kriminogen vaziyati ogʻir boʻlgan 97 ta va 5-yildan buyon “qizil” toifadan chiqmayotgan 9 ta mahallalarda amalga oshirilayotgan ishlar, ularga biriktirilgan masʼul rahbarlarning faoliyati tanqidiy muhokama qilindi.
Muhokamada yuqoridagi mahallalarga biriktirilgan masʼullar, “mahalla yettiligi” aʼzolari ishtirok etdilar.
Tadbir davomida har bir mahallaning jinoyatchilik ahvolidan kelib chiqib, koʻplab oldini olish mumkin boʻlgan jinoyatlarni sodir etilishiga imkon yaratib, mahallalarda hamkorlikdagi profilaktik tadbirlarni talab darajasida tashkil etmagan “mahalla yettiligi” vakillari va boshqa masʼullarning faoliyati keskin tanqid ostiga olindi.
Shuningdek, mahallalarda profilaktik tadbirlarni kuchaytirish, aholi gavjum hududlarni zamonaviy kuzatuv kameralari bilan jihozlash, aholi oʻrtasida huquqiy madaniyatni oshirish, virtual profilaktikani yanada jadallashtirish yuzasidan aniq vazifalar belgilab berildi.
Andijon viloyati IIB Axborot xizmati