O‘zbеkiston Rеspublikаsi Ichki ishlаr vаzirligi

Yozning jazirama issigʻida oziq-ovqat mahsulotlari, ayniqsa, goʻsht va sut mahsulotlari, turli tuzlama hamda salatlarni xarid qilishda ehtiyotkor boʻlmasak, sogʻligimiz uchun jiddiy xavf tugʻiladi. Buning uchun bozor-u savdo doʻkonlarida sotilayotgan mahsulotlarning sifati, sanitariya-epidemiologik qoidalariga rioya qilinishiga alohida eʼtibor qaratishimiz lozim. Viloyat IIB JXX JTSB Karantin tadbirlarini taʼminlash guruhi xodimlari bizning bu boradagi ishonchli posbonlarimiz hisoblanadi.

- Yaqinda viloyatimiz boʻylab oʻtkazilgan «Xavfsiz hudud — dolzarb 30 kunlik» maxsus profilaktik tadbirlari davomida shahar va tumanlardagi markaziy bozorlarda joylashgan savdo doʻkonlarida karantin va sanitariya-epidemiologiya qoidalariga rioya qilinishi tekshirildi. Veterinariya-sanitariya qoidalari normalarini buzganligi uchun 35 nafar shaxsga nisbatan maʼmuriy javobgarlik choralari koʻrildi, — deydi guruh komandiri, kapitan Furqat Husainov.

Xususan, 8-iyul kuni Qorakoʻl tumanida oʻtkazilgan maxsus profilaktik tadbir davomida «Dargʻali» mahallasida yashovchi H.B.ning xonadonidan 251 kg yirik shoxli hayvonga tegishli goʻsht va goʻsht mahsulotlarini noqonuniy tartibda, veterinariya-sanitariya qoidalariga zid ravishda, tegishli veterinariya hujjatlarisiz sotish maqsadida saqlab kelayotganligi aniqlandi. Ushbu goʻsht mahsulotlari isteʼmolga yaroqsiz deb topildi. Fuqaro H.B.ga nisbatan MJtKning 109-moddasi bilan maʼmuriy bayonnoma rasmiylashtirildi.

Peshku tumani «Degdevon» mahallasida yashovchi E.Sh.ning yashash uyida noqonuniy kushxona borligi soha xodimlari tomonidan aniqlandi. U xonadonidagi qoʻlbola muzlatkichda 15 dona yirik mol boshi va 64 kilogramm goʻsht hamda goʻsht mahsulotlarini hech qanday tegishli hujjatlarsiz, sanitariya qoidalariga rioya etmagan holda saqlab kelayotgan ekan. Mazkur holat yuzasidan tuman VSEL xodimlari bilan hamkorlikda dalolatnoma tuzilib, yuqoridagilarning isteʼmolga yaroqliligini aniqlash maqsadida viloyat veterinariya laboratoriyasiga joʻnatildi.

Shuningdek, Buxoro shahridagi Markaziy dehqon bozorida hamkorlikda oʻtkazilgan tezkor profilaktik tadbirlarning birida Jondor tumanida yashovchi fuqaro hech qanday veterinariya hujjatlarisiz 1257 kg tovuq goʻshti mahsulotlarini olib ketayotganligi aniqlandi. Holat yuzasidan fuqaroga nisbatan maʼmuriy bayonnoma rasmiylashtirilib, mahsulotning yaroqliligini aniqlash uchun laboratoriyaga topshirildi.

Umuman, oʻtgan olti oy davomida guruh tomonidan isteʼmolga yaroqsiz deb topilgan 9611 kg goʻsht va goʻsht mahsulotlari, 1059 kg sut va sut mahsulotlari, 7914 kg baliq, 11800 dona tuxum, 3497 kg tuzlama va 3383 kg nomaʼlum sharoitda tayyorlangan oziq-ovqat savdosi oʻz vaqtida toʻxtatib qolindi. Shu kunga qadar veterinariya-sanitariya qoidalari normalarini buzganligi uchun 206 nafar fuqaroga nisbatan maʼmuriy bayonnoma rasmiylashtirilib, qonun ustuvorligi taʼminlandi.

Mirzoqul AHADOV, oʻz muxbirimiz.
Buxoro viloyati.