IIV Akademiyasida Tojikiston IIVning Dushanbe shahri boʻyicha boshqarmasining delegatsiyasi uchun maxsus oʻquv mashgʻulotlari tashkil etildi
2025-08-17 11:05:00 / Yangiliklar
Mintaqaviy kiberxavfsizlik darajasini oshirishda muhim qadam. 10–15-avgust kunlari IIV akademiyasida Tojikiston IIVning Dushanbe shahri boʻyicha boshqarmasi boshligʻi oʻrinbosari, militsiya polkovnigi Fayzali Saydalizoda boshchiligidagi delegatsiya aʼzolari uchun maxsus oʻquv mashgʻulotlari tashkil etildi.
Akademiyaning malakali professor-oʻqituvchilari, tajribali amaliyot xodimlar tomonidan olib borilgan mashgʻulotlarda kiberjinoyatlarning tahdid koʻlami, ularga qarshi kurashish faoliyatini zamonaviy uslubda tashkil etish, raqamli texnologiyalar vositasida sodir etilgan jinoyatlarni tergov qilishning oʻziga xos jihatlari keng yoritildi. Shuningdek, axborot tizimidan foydalanib sodir etilayotgan firibgarlik va oʻgʻrilik jinoyatlarini tergov qilishda isbotlanishi lozim boʻlgan holatlar hamda tergov jarayonida qoʻllaniladigan ilgʻor metodlar boʻyicha amaliy bilimlar berildi.
Oʻquv mashgʻulotlaridan soʻng tojikistonlik hamkasblar IIV Akademiyasining oʻquv-tarbiya jarayoni, ilmiy-tadqiqot ishlari va xalqaro hamkorlik yoʻnalishlari bilan yaqindan tanishdilar. Ularga oliygohning maqsad va vazifalari, ichki ishlar organlari uchun yuqori malakali rahbar kadrlar tayyorlashdagi ustuvor yoʻnalishlar hamda taʼlim jarayoniga tatbiq etilgan ilgʻor pedagogik texnologiyalar haqida maʼlumot berildi.
Delegatsiya aʼzolari Maʼnaviyat va maʼrifat markazi, Akademiya tarixi muzeyi va “Vatanparvarlik burchagi”dagi ekspozitsiyalarni koʻzdan kechirdi. Zamonaviy sport inshootlari, amaliy mashgʻulot maydonlari mehmonlarda iliq taassurot qoldirdi.
Tomonlar yosh avlodni nafaqat professional bilim va koʻnikmalarga ega mutaxassis, balki yurt shaʼnini xalqaro maydonlarda munosib himoya qila oladigan barkamol shaxs sifatida tarbiyalash masalalarida fikr almashdilar. Soʻnggi yillarda IIV akademiyasida amalga oshirilgan keng koʻlamli islohotlar, kursant va tinglovchilar uchun yaratilgan qulay infratuzilma hamda xalqaro tajriba almashishning ahamiyati alohida taʼkidlandi.
Muxtasar aytganda, mazkur oʻquv mashgʻulotlari ikki davlat huquq-tartibot organlari oʻrtasida tajriba almashish, axborot xavfsizligini mustahkamlash va mintaqaviy kiberxavfsizlik darajasini oshirishda muhim qadam boʻldi.
IIV Akademiyasi Axborot xizmati