Raqamlashtirish – hududlarda xavfsiz muhit yaratishning samarali usuli
2025-08-16 23:40:00 / Yangiliklar
Samarqand viloyati hokimi vazifasini bajaruvchi Adiz Boboyev viloyat IIB Tezkor boshqaruv markazida boʻlib, bu yerdagi ish jarayonlari bilan yaqindan tanishdi.
Viloyat IIB masʼul xodimlari tomonidan markaz tizimi va islohotlarning borishi, raqamlashtirish jarayonlarining amaliyotga tatbiq etilishi borasida amalga oshirilayotgan ishlar haqida maʼlumot berildi.
Davlatimiz rahbarining “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi Qarorining ijrosini taʼminlash borasida amalga oshirilgan ishlar ham tahlil etildi.
Kriminogen vaziyati ogʻir mahallalar hududlarida kuzatuv kameralari, aholi gavjum maskanlar, bozorlar va jamoat joylarida yuzni va avtoraqamlarni tanib oluvchi video kuzatuv moslamalari oʻrnatilishi hamda ularni Tezkor boshqaruv markaziga integratsiya qilinishi, “Raqamli mahalla” dasturini keng tatbiq etish boʻyicha aniq vazifalar belgilab olindi.
Shuningdek, Samarqand shahri va tumanlar markazlaridagi transport vositalari gavjum yoʻllarda tirbandliklarning oldini olish borasida bajarilishi lozim boʻlgan masalalarga alohida toʻxtalib oʻtilib, bu borada masʼullarga tegishli topshiriqlar belgilab berildi.
Samarqand viloyati IIB Axborot xizmati