Qashqadaryo viloyatida “qizil” toifadagi mahallalardagi vaziyat oʻrganildi
2025-08-16 19:55:00 / Yangiliklar
Davlat rahbarining joriy yil 19-20-iyun kunlari Qashqadaryo viloyatiga tashrifi davomida hududlarni ijtimoiy-iqtisodiy rivojlantirish, aholini bandligini taʼminlash, kriminogen vaziyati ogʻir 62 ta “qizil“ toifadagi mahallalarda jinoyatchilikni jilovlash boʻyicha bergan topshiriqlari ijrosini taʼminlash boʻyicha vohada bir qator ishlar amalga oshirilmoqda.
Jumladan, Prezident Administratsiyasi tomonidan tasdiqlangan, viloyatda joriy yil 3-choragida “qizil” toifadagi hududlarda amalga oshirilishi lozim boʻlgan tadbirlarning “Yoʻl xaritalari“ mahallalar kesimida ishlab chiqilib, ijrosi boʻyicha keng qamrovli chora-tadbirlar amaliyotga joriy etilmoqda.
Yaqinda viloyat hokimi Murotjon Azimov masʼul tashkilotlar rahbarlari bilan Qarshi shahridagi “qizil” toifadagi “Navo“ mahallasida aholi bilan uchrashdi hamda ularni qiynayotgan masalalar, xususan, jinoyatlarni oldini olish borasida oʻrganishlar olib bordi.
Jarayonda mahalla yettiligining huquqbuzarliklar va jinoyatlarni oldini olish borasidagi faoliyatini tahlil etdi. Jinoyatlarni yuzaga keltirgan shart-sharoitlarni muhokama etib, kelgusida amalga oshirilishi lozim boʻlgan ishlar boʻyicha yettilikka topshiriqlar berdi.
Viloyat hokimi mahallaning “Qarshi city” majmuasida yangi “Huquq-tartibot maskani” loyihasi bilan tanishdi. Maskanni tez va sifatli qurib foydalanishga topshirish boʻyicha masʼullarga tavsiya va takliflar berdi. Masʼullarga Prezidentimizning PQ-1-sonli qaroriga asosan, tashvish tugmasi, aholi gavjum boʻladigan maskanlarda videokuzatuv hamda 360 gradus PTZ aylanali yuzni, davlat raqam belgilarni aniqlashga ixtisoslashgan kameralar oʻrnatib, profilaktika inspektoriga integratsiya qilish topshirigʻini berdi.
Aniqlangan kamchiliklarni bartaraf etish boʻyicha tegishli chora-tadbirlar belgilanib, masʼullarga muammolarni tezkor hal etish boʻyicha topshiriq berildi.
Shuningdek viloyat hokimi masʼul tashkilotlar rahbarlari bilan tumandagi “qizil” toifadagi “Tallikuron“ mahallasi yettiligi bilan muloqotda boʻlib, huquqbuzarliklar va jinoyatlarni oldini olish borasidagi faoliyatini tanqidiy-tahlil etildi. Mahallada sodir etilgan jinoyatlar, bunga shart-sharoit yaratgan omillar muhokama etilib, kelgusida bu kabi holatlarni oldini olish va amalga oshirilishi lozim boʻlgan ishlar boʻyicha yettilikka aniq topshiriqlar berildi.