IIV Maʼnaviy - maʼrifiy ishlar va kadrlar bilan taʼminlash departamenti rahbariyati tomonidan navbatdagi shaxsiy qabul oʻtkazildi
2025-08-14 10:30:00 / Yangiliklar
Ichki ishlar vazirligi hamda uning hududiy boʻlinmalari fuqarolar murojaatlarini samarali koʻrib chiqish tizimini takomillashtirish maqsadida muntazam ravishda shaxsiy va sayyor qabullar oʻtkazib kelmoqda. Bunday amaliyot aholi ehtiyoj va muammolarini bevosita tinglash, ularga amaliy yordam berish, joylardagi holatni chuqur oʻrganish hamda tizim ish faoliyatini yanada yaxshilashga xizmat qilmoqda.
13-avgust kuni, Ichki ishlar vaziri oʻrinbosari, general-mayor Davron Nazarmuxamedov boshchiligida navbatdagi shaxsiy qabul tashkil etildi. Unda kadrlar siyosati, xizmat faoliyati, pensiya tayinlash masalalari, shuningdek, xodimlarning ijtimoiy taʼminoti bilan bogʻliq masalalar atroflicha koʻrib chiqildi.
Mazkur tadbir Toshkent shahridagi IIV Transport va turizm obyektlarida xavfsizlikni taʼminlash boshqarmasi binosida oʻtkazildi. Murojaat qilgan fuqarolarning har bir masalasi diqqat bilan oʻrganib chiqildi, zarur huquqiy tushuntirishlar berildi hamda ayrim murojaatlar yuzasidan joyida hal etish chorasi koʻrildi.
Uchrashuv fuqarolar bilan ochiq muloqot oʻrnatish, ichki ishlar tizimiga boʻlgan ishonchni oshirish va inson manfaatlarini ustuvor qilish yoʻlidagi amaliy saʼy-harakatlarning yaqqol ifodasi boʻldi.