Qashqadaryo viloyati IIBda Navroʻzi olam shukuhi
2024-03-24 10:55:00 / Yangiliklar
Fasllar kelinchagi bahorning eng koʻrkam va tarovatli barcha birdek orziqib kutadigan shodiyonasi — Navroʻzi olam ayyomi munosabati bilan Qashqadaryo viloyati IIBda bayram tadbiri boʻlib oʻtdi. Bahor ayyomi, tabiat yangilanish fasli, Yangi yil, Yangi kun elchisi — Navroʻz bayramida milliy taomlar dasturxoni yozildi.
Bayram tadbiriga boshqarma sohaviy xizmatlarida xizmat qilayotgan va uzoq yillik samarali xizmatdan soʻng bugungi kunda faxriylik gashtini surayotgan pensionerlar, ichki ishlar organlarining xodimlari bayram dasturxoniga taklif etildi.
Tadbirni viloyat IIB boshligʻi polkovnik Abduvoxid Ismoilov ochib, Navroʻz bayrami munosabati bilan Ichki ishlar vazirining soha xodimlariga yoʻllagan bayram tabrigini oʻqib eshittirdi.
Tantanali tadbirda viloyat hokimi Murotjon Azimov ham soha xodimlarini Navroʻzi olam bayrami bilan qutladi.
Soʻngra, Ichki ishlar organlaridagi koʻp yillik fidokorona xizmatlari, mamlakatimizda tinchlik va osoyishtalikni taʼminlash, jinoyatchilikka qarshi kurashish va uni oldini olish ishlariga qoʻshgan munosib hissalari hamda «21-mart – Navroʻz umumxalq bayrami» munosabati bilan Oʻzbekiston Respublikasi Prezidentining 2024-yil 21-mart kunidagi «Mahalla tizimi xodimlari kuni munosabati bilan bir guruh yurtdoshlarimizni mukofotlash toʻgʻrisida»gi Farmoniga binoan Dehqonobod tumani ichki ishlar boʻlimi «Beshbuloq» mahalla fuqarolar yigʻinidagi profilaktika katta inspektori, podpolkovnik Xusan Abraxmatov «Sodiq xizmatlari uchun» medali bilan taqdirlandi.
Bundan tashqari, Ichki ishlar vazirining buyrugʻiga koʻra bir guruh ichki ishlar organlari xodimlariga «Aʼlo xizmatlari uchun», I-II-III-darajali «Ichki ishlar organlarida benuqson xizmatlari uchun» koʻkrak nishonlari, «Faxriy yorliq», esdalik qoʻl soati va pul mukofotlari tantanali ravishda topshirildi.
Qashqadaryo viloyati Ichki ishlar boshqarmasida koʻtarinki kayfiyat, shod-u xurramlikda nishonlagan Navroʻz bayrami munosabati bilan viloyat ichki ishlar boshqarmasida katta doshqozonda sumalak solinib, sumalak sayli tashkil qilindi.
Tadbirda soha malikalari tomonidan tayyorlangan bahor taomlari, koʻklam neʼmatlari dasturxonga tortiq etildi. Viloyat ichki ishlar organlarida xizmat qilayotgan shahodatlangan xotin-qizlar oʻrtasida «Eng pazanda xodima» musobaqasi oʻtkazilib, gʻoliblar boshqarma rahbariyatining diplomi va qimmatbaho sovgʻalari bilan taqdirlandi.
Tadbirda vohaning taniqli sanʼatkorlari tomonidan ijro etilgan kuy-qoʻshiqlar ishtirokchilarga xush kayfiyat ulashdi.
Qashqadaryo viloyati IIB Axborot xizmati