Oʻzbekiston Respublikasi Ichki ishlar vaziri general-leytenant Poʻlat Bobojonovning Navroʻz – umumxalq bayrami munosabati bilan bayram tabrigi
2024-03-21 13:00:00 / Yangiliklar
Ichki ishlar organlari xodimlari, harbiy xizmatchilari, taʼlim muassasalari professor-oʻqituvchilari, tinglovchi-kursantlari, soha faxriylari hamda yurtimiz tinchligini himoya qilib, xizmat burchini bajarish chogʻida halok boʻlgan xodimlarning oila aʼzolarini 21-mart – Navroʻz umumxalq bayrami bilan samimiy tabriklayman.
Navroʻz xalqimizning tabarruk va goʻzal qadriyatlaridan biri boʻlib, uch ming yildan ortiq tarixga ega qadimiy bayramdir.
Muhtaram Prezidentimiz Shavkat Miromonovich Mirziyoyev bayram tabriklarida Navroʻzning mohiyati, mamlakatimizdagi tinchlik-osoyishtalikning qadri haqida «Mustaqillik yillarida Navroʻzi olam diyorimizdagi barcha millat va elat vakillarini yagona va ahil oila etib birlashtiradigan doʻstlik va nafosat bayramiga aylanganini biz yuksak qadrlaymiz. Bunday noyob va bebaho boyligimizni hamisha koʻz qorachigʻiday asrab-avaylaymiz», – deya alohida taʼkidlaganlar.
Darhaqiqat Navroʻzi olamni yurtimizda yangilanish, tinchlik va doʻstlik bayrami sifatida keng nishonlash ezgu anʼanaga aylangan.
Birlashgan millatlar tashkilotining qarori bilan 21-mart sanasi butun dunyoda «Xalqaro Navroʻz kuni» sifatida keng nishonlanayotganligining oʻzi ham mazkur Sharq Yangi yili naqadar ulkan qadriyat ekanligini anglatadi.
Qadrli hamkasblar!
Ushbu qutlugʻ ayyomda sizlarning har biringizga yurt tinchligi, osoyishtaligi va ravnaqi yoʻlida qilayotgan munosib xizmatingiz uchun minnatdorlik bildirib, olib borayotgan masʼuliyatli va sharafli ishlaringizda ulkan muvaffaqiyatlar yor boʻlishini tilayman.
Navroʻz har bir oila, har bir xonadonga quvonch, fayzu-baraka olib kelsin!
P.R.Bobojonov,
Oʻzbekiston Respublikasi Ichki ishlar vaziri,
general-leytenant.
2024-yil 21-mart