“Toʻmaris izdoshlari” musobaqasi yakunlandi, gʻoliblar aniqlandi
2025-08-12 12:25:00 / Yangiliklar
Yurtimizda sogʻlom turmush tarzini targʻib qilish, aholi keng qatlamlarini sportga jalb qilish davlat miqyosidagi maqsadli vazifalardan biridir. Shu kabi vazifalar ijrosi sifatida kuni kecha Toshkent shahar IIBBda “Toʻmaris izdoshlari” musobaqasi oʻtkazildi. Unda poytaxt IIBB va hududiy boʻlinmalarida xizmat olib borayotgan 84 nafar ayol-xodimalar 5 ta yoʻnalish: “Eruditsiya yoki bilimdonlik”, ”Oʻq otish tayyorgarligi”, “Harbiy tayyorgarlik”, “Jismoniy tayyorgarlik”, “Epchil, tejamkor va orasta beka” nominatsiyalari boʻyicha qizgʻin bahslarga kirishdilar.
“Eruditsiya yoki bilimdonlik” sharti boʻyicha kuch sinashgan ishtirokchilar Oʻzbekiston tarixi va anʼanalari, respublikamiz Qurolli Kuchlarining harbiy nizomi, “Oʻzbekiston respublikasi fuqarolarining harbiy xizmatni oʻtash tartibi toʻgʻrisidagi nizom” hamda sohaviy xizmatlarga taalluqli savollarga javob berishdi. Ikkinchi shart boʻyicha har bir jamoadan 6 nafar xodima qatnashib, “Makarov” toʻpponchasidan nishonga oʻq uzish mashqini bajardilar. “Dinamo” suv havzasida 6 nafar xodima erkin uslubda 50 metr masofaga suzish boʻyicha musobaqaning uchinchi shartida bellashishdi. Musobaqaning ikkinchi IIBB PPX brigadasida oʻtkazilgan “Harbiy tayyorgarlik” shartida belgilangan 5 donadan pichoq otish bahslarida esa musobaqaning ishtirokchilari oʻz merganlik mahoratlarini namoyon etdilar. Eng oxirgi “Epchil, tejamkor va orasta beka” sharti boʻyicha har bir jamoadan qatnashgan 6 nafar xodimalar pazandalik isteʼdodlarini ishga solishdi.
Musobaqa natijalariga koʻra jamoaviy hisobda 1-oʻrin Yakkasaroy tumani IIO FMB jamoasiga, 2-oʻrin Mirzo Ulugʻbek tumani IIO FMB, 3-oʻrin IIBB YHXB va JTSB jamoalariga nasib etdi. Shuningdek, yakkalik bahs natijalariga koʻra “Eruditsiya yoki bilimdonlik” sharti boʻyicha eng yuqori ball toʻplagan Yunusobod tumani IIO FMB profilaktika inspektori, leytenant Dilfuza Asadova 1-oʻringa, Yakkasaroy tumani IIO FMB Kotibiyat ish yurituvchisi, safdor Lobar Rahmonova 2-oʻringa, Mirzo Ulugʻbek tumani IIO FMB huzuridagi Tergov boʻlimi tergovchisi, mayor Nazokat Toshboyeva 3-oʻringa munosib deb topildi.
“Oʻq otish tayyorgarligi” sharti boʻyicha 1-oʻrinni Yashnobod tumani IIO FMB xotin-qizlar masalalari boʻyicha katta inspektor, katta leytenant Mohinur Joʻraboyeva, 2-oʻrinni Olmazor tumani IIO FMB Axborot texnologiyalar sohasidagi jinoyatlarni oldini olish boʻlimi inspektori, katta leytenant Maʼmura Salixanova, 3-oʻrinni IIBB katta mutaxassisi, kichik serjant Dilafroʻz Jumagaldiyeva egalladi.
“Jismoniy tayyorgarlik” shartida 1-oʻrin IIBB PPXB inspektori, safdor Gulnoraxon Imomovaga, 2-oʻrin Yakkkasaroy tumani IIO FMB Kotibiyat katta ish yurituvchisi, safdor Shohsanam Mavlanovaga, 3-oʻrin IIBB PPXB inspektori, safdor Robiya Qoʻchqorovalarga nasib etdi.
“Harbiy tayyorgarlik” nominatsiyasida eng yuqori ball bilan 1-oʻringa Mirobod tumani IIO FMB Yoshlar masalalari boʻyicha profilaktika katta inspektori, mayor Aziza Orazbayeva, 2-oʻringa Yunusobod tumani IIO FMB xotin-qizlar masalalari boʻyicha katta inspektori, kapitan Dilnoza Ubaydullayeva, 3- oʻringa Uchtepa tumani IIO FMB Kadrlar bilan taʼminlash guruhi kichik inspektori, safdor Gulnoza Maxsutovalar loyiq topildi.
Musobaqa shartlarini bajarishda oʻz bilimdonligi va mahoratlarini namoyish qilib gʻoliblikni qoʻlga kiritgan ayol-xodimalar Bosh boshqarma rahbariyati tomonidan tegishli diplom va qimmatbaho sovgʻalar bilan taqdirlandilar. Keng dunyoqarashi, kasbiy va jangovar tayyorgarliklari, shu bilan birga orasta uy bekasi boʻlgan Toshkent shahar IIBB ayol-xodimalari xalqimizning oqillik va qahramonlik, vatanparvarlik ramzi – Toʻmarisning munosib izdoshlari ekanliklarini namoyon etishdi.
Toshkent shahar IIBB Axborot xizmati