O‘zbеkiston Rеspublikаsi Ichki ishlаr vаzirligi

Sirdaryo viloyati IIB Maʼnaviy-maʼrifiy ishlar va kadrlar bilan taʼminlash xizmati psixologi, katta leytenant Shavqiddin Shermatov 2019-yilda Guliston davlat universitetini psixologiya yoʻnalishi boʻyicha tugatgan.

IIV huzuridagi JIED Uchinchi mintaqaviy hududi 39-manzil koloniyada psixolog sifatida ish boshlagan lavhamiz qahramoni mahkumlarning ruhiy holatini yaxshilash boʻyicha ancha tajriba toʻpladi.

2021-yilda Guliston shahar IIBga psixolog vazifasiga ishga oʻtadi. 2022-yildan boshlab esa hozirgi lavozimida xizmat qilib kelmoqda. Intizomli, oʻz ishiga masʼuliyatliligi bilan nom qozongan. Ayniqsa, uning xodimlar bilan tezda til topishishi, ularning ruhiy holatiga aniq baho bera olishi eʼtirof etiladi.

Katta leytenant Shavqiddin Shermatov nafaqat boshqarma shaxsiy tarkibi, balki barcha tuman-shahar ichki ishlar boʻlimlari va sohaviy xizmatlardagi xodimlarning ruhiy-maʼnaviy holati barqarorligini taʼminlashga ham masʼul. Shu bois tez-tez hududlarda boʻlib, xodimlar ishtirokida treninglar, test sinovlari oʻtkazadi. Shu asosda har bir xodimning ruhiy holatini tahlil qiladi.

- Xodimda agressivlik, depressiya holati oshganini koʻrsatuvchi shkala baland chiqadigan boʻlsa, avval oʻzimiz u bilan shugʻullanamiz, — deydi katta leytenant Shavqiddin Shermatov. -Shundan keyin ham oʻzgar-ish boʻlmasa, shifokorga yoʻnaltiramiz.

Psixologga sohaviy xizmatlar va tuman-shahar IIBlardan tez-tez maslahatlashuvlar, murojaatlar boʻlib turadi. Masalan, yaqinda Guliston tumani IIB boshligʻining maʼnaviy-maʼrifiy ishlar boʻyicha oʻrinbosari murojaat qilib, xodimlardan birining ruhiy holati izdan chiqqanini bildirdi. Unda kuchli depressiya kuzatilgan.

Shavqiddin tuman IIBga borganida kechki saflanish boʻlayotgandi. Xodimni bir chetdan kuzatdi. Yigʻilish tugagach, uni yakka suhbatga chorladi. 25 yoshlardagi xodim bilan suhbat chogʻida uning oilasida otasi bilan munosabatida muammolar borligi oydinlashdi. Xodim oʻzining muammolarini oila rahbariga ochiq ayta olmaydi. Natijada stressga tushib qolgan.

Shavqiddin oilada ota bilan munosabatda qanday yoʻl tutish kerakligini, oilaviy muhitni buzmasdan, muammolarini ochiq bayon qila olish usullarini xodimga oʻrgatdi. Bu bilan toʻxtab qolmay, uning oilasida ham boʻldi. Ota-onasi bilan suhbatlashdi. Suhbatga ehtiyotkorlik bilan oʻgʻlini ham jalb qildi. Bir soatlik muloqot chogʻida oʻgʻilning intilishlari, ehtiyojlarini otasiga sekin-asta tushuntirdi. Natija kutilganidanda ziyoda boʻldi. Stressga tushgan xodimning kayfiyati koʻtarildi. Muammolari ham hal boʻla boshladi.

- Ichki ishlar organi xodimining ish vaqti doim tigʻiz, — deydi viloyat IIB boshligʻi oʻrinbosari polkovnik Qahramon Shermatov. — Shu bois u koʻpincha shaxsiy hayotini, ehtiyojlarini ikkinchi darajaga qoʻyadi.

Bu esa depressiyaga olib borishi mumkin. Mana shunday holatlarda biz psixolog Shavqiddin Shermatovga murojaat qilamiz. U oʻz sohasining haqiqiy ustasi.

Xodimlarning maʼnaviyati, ruhiyatini yanada yuksaltirishda treninglarning oʻrni katta. Ana shunday tadbirlar yordamida har bir xodimga stress bilan kurashish, agressivlik oʻrniga muqobil munosabat yaratish uslublari oʻrgatiladi.

Stressning oldini olish uchun muammo yoki nostandart vaziyatga katta muammo sifatida qaramaslik, sovuqqonlik bilan tahlil qilish, masalani yechishning bir necha bosqichli choralarini ishlab chiqish, ogʻir vaziyatlardan qoʻrqmaslik, aksincha, ularga qarshi dadil kurashish zarurligi koʻrsatib oʻtiladi.

Shu bilan birga, har bir xodimga oilaga, farzandlarga, ota-onaga vaqt ajratish zarurligi tavsiya etiladi.

Eʼtiborlisi, joriy yilda xodimlarning intizom darajasi, xizmat samaradorligi nisbatan oshishida ruhiy barqarorlikni taʼminlash maqsadida oʻtkazilgan treninglar, tadbirlar ijobiy taʼsir etgani kuzatildi.

©️ “Postda” gazetasi, Abdurahmon Mustafoqulov, Sirdaryo viloyati.