O‘zbеkiston Rеspublikаsi Ichki ishlаr vаzirligi

Yurtimizda qonun ustuvorligini taʼminlash, fuqarolar xavfsizligini kafolatlash va jinoyatchilikning oldini olish muhim vazifalardan biriga aylangan. Uzun tumani IIB huzuridagi tergov guruhi xodimlari ham xuddi shu ezgu maqsad yoʻlida sidqidildan xizmat qilmoqdalar.

Guruh tarkibidagi tajribali mutaxassis — katta tergovchi, mayor Haqnazar Safarov va surishtiruvchi, leytenant Doston Xolmurodov yil boshidan buyon yuzdan ziyod jinoyat ishlarini koʻrib chiqib, ularning har biri yuzasidan xolis va qonuniy qarorlar chiqarilishiga erishishdi.

Faoliyat jarayonida asosan yoʻl-transport hodisalari, firibgarlik, giyohvandlik moddalari muomalasi va ularning noqonuniy aylanmasi bilan bogʻliq jinoyatlar chuqur oʻrganilib, har bir holatga huquqiy baho berildi. Bu esa nafaqat jinoyatning fosh qilinishi, balki aybdor shaxslarning qonuniy javobgarlikka tortilishida ham muhim ahamiyat kasb etdi.

- Soʻnggi paytlarda kiberjinoyatlar soni sezilarli darajada ortib boryapti, — deydi mayor Haqnazar Safarov. — Internet orqali firibgarlik holatlari, shaxsiy maʼlumotlarni oʻgʻirlash kabi holatlar koʻpaymoqda. Aksariyat fuqarolar soddaligi va ishonuvchanligi tufayli kiberjinoyatchilarning tuzogʻiga ilinmoqda. Shu bois biz profilaktik tadbirlarga ham alohida eʼtibor qaratyapmiz.

Darhaqiqat, tergov guruhi xodimlari profilaktika inspektorlari bilan hamkorlikda mahallalarda kiberxavfsizlikka bagʻishlangan uchrashuvlar, ochiq suhbatlar, targʻibot tadbirlarini oʻtkazib kelmoqdalar. Ular orqali fuqarolar orasida huquqiy ong va madaniyatni oshirish, ayniqsa, internetdan xavfsiz foydalanish koʻnikmalarini shakllantirish maqsad qilingan.

Alohida taʼkidlash joizki, olib borilgan tizimli ishlar natijasida joriy yilning oʻtgan davrida oʻtgan yilning mos davriga nisbatan tumanda oʻgʻrilik va voyaga yetmaganlar tomonidan sodir etilgan jinoyatlar soni keskin kamaydi.

Yana bir muhim natija — qidiruvda boʻlgan bir fuqaro tergov guruhi xodimlari tomonidan qoʻlga olinib, qonun ixtiyoriga topshirildi.

Nafsilamrini aytganda, tumanda jinoyatchilikka qarshi kurashish, fuqarolarning huquqiy manfaatlarini himoya qilish, xavfsiz muhit yaratish borasida olib borilayotgan chora-tadbirlar oʻz natijasini bermoqda. Bu jarayonda tergov guruhi xodimlarining fidokorona mehnati alohida eʼtirofga loyiq.

Feruza RAHMONQULOVA, oʻz muxbirimiz.
Surxondaryo viloyati.