O‘zbеkiston Rеspublikаsi Ichki ishlаr vаzirligi

Mamlakatimizda aholi xavfsizligini taʼminlash, huquqbuzarliklarning barvaqt oldini olish hamda jinoyatchilikka qarshi kurashish davlat siyosatining ustuvor yoʻnalishlaridan biri sifatida belgilangan.

Davlat rahbarining topshiriqlariga asosan, bu borada barcha hududlarda, xususan, Fargʻona viloyatida ham keng koʻlamli islohotlar amalga oshirilmoqda.

Ushbu vazifalarning ijrosini taʼminlash maqsadida Fargʻona viloyatda kompleks inspektorlik oʻrganishlar olib borildi. Xususan, viloyatining barcha hududlari, shu jumladan Uchkoʻprik, Buvayda va Soʻx tumanlari hamda Margʻilon shahri ichki ishlar boʻlinmalarida soha vakillarining qonunbuzarliklarning oldini olish va jinoyatchilikka qarshi kurashishga qaratilgan faoliyati oʻrganildi.

Jarayonda, viloyat ichki ishlar boshqarmasi aloqa va axborotlashtirish boʻlimi faoliyati hamda yangi qurilayotgan situatsion markazda amalga oshirilayotgan ishlar, zamonaviy situatsion markazning loyiha-rejasi taqdimoti ham oʻtkazildi.

Shuningdek, xodimlarning xizmat vazifalarini unumli bajarishlari uchun yaratilgan shart-sharoitlar, mavjud imkoniyatlar, jismoniy va jangovar tayyorgarlikni yuksaltirish borasida amalga oshirilayotgan ishlar koʻzdan kechirilib, ularning kasbiy tayyorgarligini oshirish, qayta tayyorlash, malakalarini oshirish hamda jamoat tartibi va aholining xavfsizligini taʼminlash borasida zarur tavsiyalar berildi.

Ichki ishlar vazirligi ishchi guruhi, Uchkoʻprik, Buvayda tumanlari hamda Margʻilon shahar ichki ishlar boʻlimlarida kriminogen vaziyatni barqarorlashtirish borasida amalga oshirilayotgan ishlarni tanqidiy-tahlil qildi. Mazkur hududlarda obyektlarini qoʻriqlovga olishning sustligi, targʻibot ishlarining yetarli olib borilmayotganligi, “ogʻir” toifadagi mahallalarga biriktirilgan rahbarlarning ishlari nazoratsiz qolganligi, oqibatda profilaktik ishlar qoniqarli darajada emasligi tanqid qilindi. Bu boradagi ishlarni sifat jihatidan yaxshilash, mavjud muammolarni bartaraf etish uchun zarur koʻrsatmalar berildi.

Buvayda tumani ichki ishlar boʻlimida oʻtkazilgan taqdimotda jinoyatchilikni jilovlash va mahallalarda xavfsiz muhitni yaratish borasida olib borilayotgan ishlar bilan bir qatorda, xodimlarni ijtimoiy himoya qilish yuzasidan yoʻlga qoʻyilgan tajribaga alohida eʼtibor qaratildi.

Ichki ishlar vazirligi ishchi guruhi Soʻx tumanida ham boʻlib, jinoyatchilikni jilovlash borasida amalga oshirilayotgan ishlar bilan yaqindan tanishdi, chegara hudud aholisi bilan muloqot oʻtkazdi. Jarayonda, “Gʻaznov” mahallasi yettiligi va faollar bilan oʻzaro hamkorlikni yanada mustahkamlash, jinoyatchilikni barvaqt oldini olish hamda Davlat rahbarining tegishli topshiriqlarini ijrosini taʼminlash borasida zarur tavsiyalar berildi.

Tekshiruvlar davomida mahallalarda olib borilayotgan profilaktik ishlar, aholi bilan muloqotlar, murojaatlar bilan ishlashning ahvoli hamda mahallalarda jinoyatchilikni barvaqt oldini olish tizimining real holati tahlil qilindi. Yoshlar, xotin-qizlar va ishsiz fuqarolar oʻrtasidagi jinoyatchilikka barham berish, ijtimoiy muammolarni hal etish, raqamlashtirish va zamonaviy texnologiyalarni joriy etish borasidagi vazifalarga alohida eʼtibor qaratildi.

Mahallalarda faoliyat yuritayotgan profilaktika inspektorlarining xizmat samaradorligi, mahalla yettiligi va faollari bilan hamkorligi, aholi oʻrtasida huquqiy ongni oshirish ishlari ham oʻrganildi. Joylarda “xonadonbay” usulida ishlash, fuqarolarning murojaatlarini oʻrganish, ularga amaliy yordam koʻrsatish tizimini yanada takomillashtirish yuzasidan zarur tavsiyalar berildi.