Mustaqillik — mening taqdirimda. Yurt ishqida
2025-08-08 23:00:00 / Yangiliklar
Oʻzbekiston oʻz mustaqilligini eʼlon qilgan sana mening taqdirimda ham alohida oʻrin tutadi. Sababi, xuddi shu yili men ham orzuyimdagi sohada — ichki ishlar organlari tizimida ilk xizmat faoliyatimni boshladim. Balki shu boisdan boʻlsa kerak, zimmamdagi masʼuliyatni doimo his qilib turaman. Xizmatim davomida “Istiqlolimizni asrash — mening burchim!” degan shior bilan ishlayman.
Oʻsha kunlar hali hamon esimda: 1991-yili hozirgi Yakkasaroy tumani IIB huzuridagi Qoʻriqlash boʻlimida oddiy militsioner lavozimida xizmat boshlaganman. Faoliyatim davomida ichki ishlar organlarining turli sohalarida ishladim. Ayni paytda Yakkasaroy tumani IIO FMB 4-sonli IIB boshligʻining tashkiliy masalalar boʻyicha oʻrinbosariman.
Hududda joylashgan mahallalarda istiqomat qilayotgan 33 ming nafarga yaqin aholining osoyishtaligiga masʼulman. Fuqarolardan tushayotgan murojaatlarni qabul qilib, ularning ijrosini taʼminlab kelmoqdaman.
Bugungi kunda koʻpchilikni tashvishga solayotgan jinoyat firibgarlikdir. Ayniqsa, “olx. uz” platformasidagi yolgʻon eʼlonlarga aldanib, chuv tushayotganlar koʻp. Shu bois hududda tez-tez fuqarolarning huquqiy madaniyatini oshirishga qaratilgan ochiq muloqotlar tashkil etib kelinmoqda.
Tizimda xizmat qilayotganimga deyarli 35-yil boʻlibdi. Aslida, ichki ishlar organi xodimi boʻlish katta sharaf, chunki bu kasb egalariga xalqimiz ishonib yurt tinchligi va osoyishtaligini saqlashdek masʼuliyatli vazifani yuklagan. Buni shogirdlarimga koʻp takrorlayman.
Shuningdek, xalqning ishonchini oqlash, halol xizmat qilish, zimmasidagi masʼuliyatni chuqur anglash kerakligini taʼkidlayman. “Ortingda butun Oʻzbekiston xalqi turganini his et, kerak boʻlsa, joningni ayama, shunda yuksak sharafga erishasan, hurmat-eʼtiborga sazovor bolasan”, — deyman.
Mustaqillikning dastlabki yillari bilan bugungi kunni, bugungi davrni taqqoslab boʻlmaydi, albatta. Har sohada yangilanish, oʻzgarishlar va islohotlar amalga oshirib kelinmoqda.
Xususan, ichki ishlar organlari tizimida ham. Buni biz chuqur anglagan holda, yosh kadrlarni ona Vatanga muhabbat va burchga sadoqat ruhida tarbiyalashimiz, kim yurtini sevsa, ishida unum, topganida baraka boʻlishini uqtirishimiz lozim.
©️ “Postda” gazetasi, Ilhom Xolmirzayev, podpolkovnik.