Buxoro viloyatida Ichki ishlar boshqarmasiga qarashli tibbiyot muassasalarini rekonstruksiya qilish ishlari jadallik bilan olib borilmoqda
2025-08-08 09:00:00 / Yangiliklar
Buxoro viloyati Ichki ishlar boshqarmasining bir qator maʼmuriy binolarida, jumladan, boshqarmaning Davolash-profilaktika muassasalariga qarashli Tibbiyot boʻlimi Gospitali maʼmuriy binosida kapital qurilish va taʼmirlash ishlari jadal surʼatlarda amalga oshirilmoqda.
Bugun, Buxoro viloyati Ichki ishlar boshqarmasi boshligʻi boshchiligidagi masʼullar tomonidan ushbu rekonstruksiya ishlari joyiga chiqib oʻrganildi. Ushbu jarayonda qurilish ishlarini yuqori sifatda, zamonaviy talablar asosida olib borish, binoda innovatsion texnologiyalardan samarali foydalanish masalalariga alohida eʼtibor qaratildi.
Boshqarma rahbariyati tomonidan obyektdagi qurilish-taʼmirlash ishlari belgilangan muddat va ish grafigiga qatʼiy rioya etilgan holda yakunlanishi, bino foydalanishga toʻliq tayyor holga keltirilishi yuzasidan aniq topshiriqlar berildi.
Shuningdek, tibbiyot muassasasi faoliyati samaradorligini oshirish maqsadida binoda energiya tejovchi zamonaviy uskunalar va muhandislik tizimlaridan foydalanish, elektr energiyasi sarfini kamaytirish orqali tejamkorlikka erishish boʻyicha ham masʼullarga tegishli koʻrsatmalar berildi.
Qayd etish lozimki, ushbu gospital ichki ishlar organlari xodimlari va faxriylarining sogʻligʻini tiklash, ularga tibbiy yordam koʻrsatish sifatini yanada yaxshilashda muhim ahamiyat kasb etadi.
Kapital taʼmirdan soʻng muassasa zamonaviy tibbiy standartlarga mos, qulay va samarali faoliyat yuritish imkoniyatiga ega boʻladi.
Buxoro viloyati IIB Axborot xizmati