Andijon shahrining kriminogen vaziyati ogʻir mahallalarida joriy yilning oʻtgan 7 oyida sodir etilgan jinoyatlar yuzasidan tanqidiy muhokama yigʻilishlari oʻtkazildi
2025-08-08 09:00:00 / Yangiliklar
Oʻzbekiston Respublikasi Prezidentining 2025-yil 3-yanvardagi PQ-1-son Qarorida belgilab berilgan vazifalardan kelib chiqib, Andijon shahrining Sanoat, Paxtakor va Yaxshi mahallalarida joriy yilning oʻtgan 7 oyida jinoyatchilik va huquqbuzarliklarni barvaqt oldini olish borasidagi amalga oshirilgan ishlar tahlillar asosida tanqidiy muhokama qilindi.
Muhokama yigʻilishlari Andijon viloyati prokurori Murodillo Abduhakimov hamda viloyat IIB boshligʻi Sanjar Djabarovlar raisligida oʻtkazilib, ushbu tadbirlarda yuqoridagi mahallalarga biriktirilgan masʼullar, “mahalla yettiligi” aʼzolari, mahalliy davlat hokimiyati va faol jamoatchilik vakillari ishtirok etdilar.
Muhokamalar davomida har bir mahallaning jinoyatchilik ahvolidan kelib chiqib, koʻplab oldini olish mumkin boʻlgan jinoyatlarni sodir etilishiga imkon yaratib, mahallalarda hamkorlikdagi profilaktik tadbirlarni talab darajasida tashkil etmagan “mahalla yettiligi” vakillari va boshqa masʼullarning faoliyati keskin tanqid ostiga olindi.
Shuningdek, mahallalarda profilaktik tadbirlarni kuchaytirish, aholi gavjum hududlarini zamonaviy kuzatuv kameralari bilan jihozlash, aholi oʻrtasida huquqiy madaniyatni oshirish, yoshlar oʻrtasida targʻibot ishlarini faollashtirish yuzasidan aniq vazifalar belgilab berildi.
Har bir muhokama yakunlarida faol jamoatchilik vakillarining jinoyatchilik va huquqbuzarliklarni oldini olishga oid taklif va mulohazalari tinglanib, ularni ham amaliyotga joriy etish boʻyicha masʼullarga topshiriqlar berildi.
Tanqidiy muhokama yigʻishlari Andijon shahrining boshqa mahallalarida ham davom ettirilmoqda.
Andijon viloyati IIB Axborot xizmati