Fuqarolar murojaatlari bilan ishlash tizimi samarali tashkil etilmoqda
2025-07-07 21:30:00 / Yangiliklar
Ichki ishlar vazirligi hamda uning hududiy organlari tomonidan fuqarolar murojaatlari bilan ishlash tizimini samarali tashkil etish maqsadida muntazam ravishda shaxsiy va sayyor qabullar oʻtkazib kelinmoqda. Bu amaliyot aholining muammolarini bevosita eshitish, ularga amaliy yordam koʻrsatish, joylardagi vaziyatni chuqur oʻrganish va tizim ish samaradorligini oshirishda muhim rol oʻynamoqda.
Joriy yilning 6-avgust sanasida, Ichki ishlar vaziri oʻrinbosari, general-mayor Davron Nazarmuxamedov tomonidan navbatdagi shaxsiy qabul oʻtkazildi. Qabul Toshkent shahridagi IIV Transport va turizm obyektlarida xavfsizlikni taʼminlash departamenti binosida boʻlib oʻtdi.
Qabul davomida fuqarolarning ijtimoiy himoya, xizmat joyini koʻchirish, ishga kirish hamda ichki ishlar xodimlarining xatti-harakatlariga oid murojaatlari tinglandi. Har bir murojaat alohida koʻrib chiqilib, tegishli huquqiy tushuntirishlar berildi, ayrim masalalar esa joyida hal etildi.
Mazkur qabul fuqarolar bilan ochiq va samimiy muloqotni yoʻlga qoʻyish, ichki ishlar organlariga boʻlgan ishonchni yanada mustahkamlash, inson manfaatlarini birinchi oʻringa qoʻyishga qaratilgan tizimli ishlarning mantiqiy davomidir.