Buxoro viloyati Ichki ishlar boshqarmasi boshligʻi huzurida oʻtgan hafta sarhisobiga bagʻishlangan navbatdagi yigʻilish boʻlib oʻtdi
2025-08-05 09:00:00 / Yangiliklar
Oʻzbekiston Respublikasi Davlat Madhiyasini xor boʻlib ijro etishdan boshlangan videokonferensiya aloqa tizimi asosida oʻtkazilgan tezkor yigʻilishda viloyat studiyasidan Ichki ishlar boshqarmasi boshligʻining oʻrinbosarlari, sohaviy xizmatlar rahbarlari va shaxsiy tarkib, shahar va tumanlar IIB boshliqlari, hududiy studiyalardan shahar va tumanlar ichki ishlar organlarining toʻliq shaxsiy tarkibi ishtirok etdi.
Dastlab, maʼnaviyat va maʼrifat darsi doirasida ”Manfaatlar toʻqnashuvi — korrupsiya oʻchogʻi” mavzusida maʼruza qilindi. Shundan soʻng:
-joriy yilning oʻtgan 7 oyi davomida viloyat hududida huquqbuzarliklar va jinoyatlarni oldini olish, jismoniy va yuridik shaxslarning murojaatlarini oʻz vaqtida koʻrib chiqish va ularga nisbatan qonuniy qarorlar qabul qilish, jamoat tartibini saqlash, fuqarolar xavfsizligi va yoʻl harakati xavfsizligini taʼminlash borasida olib borilgan ishlar hamda yoʻl qoʻyilgan tizimli xato va kamchiliklar;
-Oʻzbekiston Respublikasi Ichki ishlar vazirining tegishli farmoyishi bilan oʻtkazilayotgan “Xavfsiz va sogʻlom yurt“ keng qamrovli profilaktik tadbirining ikkinchi bosqichi doirasida amalga oshirilayotgan chora-tadbirlar;
-shaxsiy tarkib oʻrtasida xizmat va ijro intizomini mustahkamlash, qonuniylikni taʼminlash masalalari birma-bir muhokama qilindi.
Koʻtarilgan har bir masala boʻyicha aniq vazifalar belgilab berilib, ularning ijrosi va natijasi mutasaddi rahbarlarning shaxsiy javobgarligi asosida nazoratga olindi.
Shu bilan birga, Ichki ishlar vazirining 2025-yil 28-iyul kunidagi 282-sonli farmoyishiga asosan joriy yilning avgust oyi “Inson qadri uchun“ shiori ostidagi “Ijtimoiy himoya oyligi“ deb eʼlon qilinganligi hamda mazkur oylik doirasida amalga oshiriladigan manzilli ishlar yuzasidan batafsil tushuntirish berilib, shaxsiy tarkib eʼtiboriga barcha zarur maʼlumotlar taqdim etildi.
Yigʻilish davomida xizmat vazifalarini bajarish bilan bogʻliq holatda qoʻpol xato va kamchiliklarga yoʻl qoʻygan ayrim masʼul xodimlar va rahbarlarga nisbatan intizomiy taʼsir choralari qoʻllanilganligi eʼlon qilindi.
Aksincha xizmat faoliyati davomida yuqori natijalarga erishib kelayotgan bir guruh xodimlar boshqarma boshligʻining buyrugʻi bilan ragʻbatlantirildi va tegishli normativ huquqiy hujjatlar asosida bir guruh xodimlarga navbatdagi maxsus unvonlar tantanali ravishda topshirildi.
Buxoro viloyati IIB Axborot xizmati