Toshkent shahar IIBB Kinologiya xizmatining yangilangan binosi namoyish qilindi
2025-08-01 11:45:00 / Yangiliklar
Jurnalist va blogerlar Toshkent shahar IIBB Jamoat tartibini saqlash boshqarmasi Kinologiya xizmatining yangilangan maʼmuriy binosiga kelishdi. Bu yerda ularga 9 ta alohida maqsaddagi binolar va ularning vazifalari tanishtirildi.
Yangi bino ikki qavatdan iborat boʻlib, birinchi qavatda navbatchilik boʻlimi, muzey, maʼrifat zali, sport zal, oʻquv xonasi, boʻlinma boshliqlari va guruh komandirlari uchun xizmat xonalari joylashgan. Ikkinchi qavat esa majlislar zali, yotoqxona, omborxona va maxsus vositalar saqlanadigan xonadan tashkil topgan.
Mehmonlarga xizmat itlarining mashgʻulot jarayonlari, imitatsiya xonalari, yoʻriqchi itlar bilan ishlash jarayoni hamda tibbiy xizmat koʻrsatish xonalari koʻrsatildi. Shuningdek, jonivorlar uchun ajratilgan volyerlar haqida maʼlumot berildi.
Intervyu jarayonida aytilgan maʼlumotlarga koʻra, kinologiya xizmati joriy yil boshidan quyidagi natijalarga erishgan:
- Fosh etilgan jami jinoyatlar soni — 200 ta.
- Giyohvandlik moddalar miqdori — 664.88 gramm.
- Profilaktik tekshiruvlar soni — 900 ta.
Markazda yaratilgan sharoitlar hamda jangovar xizmat itlari hamkasblarimizda yorqin taassurotlar hamda esdalik fotolarini qoldirdi.
Toshkent shahar IIBB Axborot xizmati