Fuqarolar murojaatlariga eʼtibor – islohotlar samarasi
2025-07-30 20:00:00 / Yangiliklar
Ichki ishlar vazirligi hamda uning hududiy organlari tomonidan fuqarolar murojaatlari bilan ishlash tizimini yanada samarali tashkil etish maqsadida muttasil ravishda shaxsiy va sayyor qabullar oʻtkazib kelinmoqda. Bu amaliyot aholi muammolarini toʻgʻridan-toʻgʻri eshitish, ularga amalda yordam koʻrsatish, joylardagi vaziyatni chuqur oʻrganish va tizimdagi ish samaradorligini oshirishda muhim ahamiyat kasb etmoqda.
Joriy yilning 30-iyul sanasida, Ichki ishlar vaziri oʻrinbosari general mayor Davron Nazarmuxamedov tomonidan shaxsiy qabul tashkil etildi. Unda ichki ishlar organlarida kadrlar bilan ishlash, xizmatni oʻtash, lavozimga qayta tiklanish, shuningdek, xodimlarning ijtimoiy himoyasi bilan bogʻliq masalalar muhokama qilindi.
Qabul Toshkent shahridagi IIV Transport va turizm obyektlarida xavfsizlikni taʼminlash departamenti binosida, oʻtkazildi. Unda murojaat etuvchilarning har bir muammosi diqqat bilan eshitilib, tegishli huquqiy tushuntirishlar berildi hamda ayrim masalalar yuzasidan joyida hal etish choralari koʻrildi.
Mazkur qabul fuqarolar bilan ochiq muloqotni yoʻlga qoʻyish, ichki ishlar organlari faoliyatiga ishonchni yanada mustahkamlash, tizimda inson manfaatlarini birinchi oʻringa qoʻyishdagi saʼy-harakatlarning yana bir amaliy ifodasi boʻldi.