Kasb fidoyisi. Undan aholi mamnun
2025-07-30 23:00:00 / Yangiliklar
“Xoʻjakent” mahallasidagi Samadovlar (voqea ishtirokchilarining ism-sharifi oʻzgartirildi) xonadonida oʻzlariga tanish boʻlgan Baxtiyor ismli usta ishlayotgan edi.
Uy egalari unga ishongani bois xotirjamlikka berilishadi. Kunlardan bir kun esa oʻsha xotirjamlik qimmatga tushib, katta miqdordagi pullari yoʻqolgani uchun “102”ga qoʻngʻiroq qilishga majbur boʻlishadi.
Chaqiruv orqali hudud profilaktika katta inspektori xonadonga yetib kelib, tezlik bilan vaziyatning tagiga yetdi. Baxtiyor oʻgʻrilikka qoʻl urgandi. Uning qilmishi fosh qilinib, qonun hukmiga havola etildi.
Quyichirchiq tumani IIB HPB profilaktika katta inspektori, katta leytenant Jahongirxoʻja Ergashev 5-yildan buyon ichki ishlar organlarida. U “Xoʻjakent” mahallasiga bevosita va yana 3 ta mahallaga katta inspektor sifatida biriktirilgan.
Dastlabki xizmat faoliyatini tumandagi “Mashrab” mahallasida olib borgan lavhamiz qahramoni, mana, uch yildirki, Xoʻjakentliklar osoyishtaligini taʼminlab kelmoqda. Uning faoliyatidan aholi mamnun.
Mahalla hozir “sariq” toifada boʻlib, 2800 nafardan ortiq fuqaro istiqomat qiladi. Aholi asosan dehqonchilik va chorvachilik bilan mashgʻul. 112 kishi xorijda, 4 nafar shaxs probatsiya nazorati ostida.
Otam Zoidxon Tayloqov isteʼfodagi mayor. Ikki akam ham oʻqimishli, ziyoli insonlar. Ularning qoʻllovi, meni tushunishlari juda qoʻl keladi. Oilang qoʻllab-quvvatlasa, charchogʻing ham bilinmas ekan, — deydi katta leytenant J.Ergashev.
Profilaktika katta inspektoriga biriktirilgan mahallalarda 10 ming nafardan ortiq fuqarolar qayd etilgan.
Toifasiga koʻra, mahallalarning 3 tasi “sariq”, bittasi “yashil”. Fidoyi xodim tez orada barcha mahallalar “yashil” toifada boʻlishini koʻzlab astoydil harakat qilmoqda.
©️ “Postda” gazetasi, Abror Poyonov, Toshkent viloyati.