Namangan viloyati IIB rahbariyati tomoindan hududlarda oʻrganish va amaliy yordam koʻrsatish ishlari izchil davom etmoqda
2025-07-30 09:00:00 / Yangiliklar
Namangan viloyatida jinoyatchilik va huquqbuzarliklarning oldini olish, jamoat xavfsizligini taʼminlash, aholi muammolarini joyida hal etishga qaratilgan tizimli ishlarni amalga oshirish maqsadida viloyat Ichki ishlar boshqarmasi rahbariyati tomonidan hududlardagi holatlar oʻrganilib, amaliy yordam koʻrsatish ishlari muntazam ravishda olib borilmoqda.
Shu maqsadda, boshqarma rahbariyati boshchiligidagi ishchi guruh tomonidan navbatdagi oʻrganish ishlari Pop tumanida oʻtkazildi. Unda “qizil” toifaga kiritilgan mahallalardagi jinoyatchilik ahvoli, profilaktika targʻibot tadbirlari, shuningdek, yoʻl-patrul xizmati maskanlari va ichki ishlar boʻlimi faoliyati atroflicha tahlil qilindi.
Jumladan, Pop tumanida joylashgan “Namangan” muntazam yoʻl-patrul xizmati maskani koʻzdan kechirilib, ushbu maskanda xizmat olib borayotgan xodimlarga yoʻl harakati xavfsizligini taʼminlash, haydovchilarning qonunga rioya qilish madaniyatini oshirish yuzasidan aniq koʻrsatmalar berildi.
Ishchi guruh tomonidan “Qoʻshminor” va “Oʻrta xonobod” mahallalaridagi ishlar oʻrganildi. Joriy yilning oʻtgan davrida amalga oshirilgan profilaktika ishlari tahlil qilinib, ayniqsa, “qizil” toifaga mansub “Qoʻshminor” mahallasida yoʻl qoʻyilgan kamchiliklar keskin tanqid qilindi hamda ularni bartaraf etish boʻyicha aniq vazifalar belgilab berildi.
Bunday oʻrganishlar va amaliy yordam koʻrsatish ishlari viloyatning barcha hududlarini qamrab olgan holda izchillik bilan davom ettiriladi.
Namangan viloyati IIB Axborot xizmati