O‘zbеkiston Rеspublikаsi Ichki ishlаr vаzirligi

Xususan, Ichki ishlar vaziri boshchiligidagi ishchi guruh tomonidan Jizzax viloyatining Mirzachoʻl, Doʻstlik, Arnasoy, Paxtakor va Zomin tumanlari, shuningdek Jizzax shahrida soha vakillarining qonunbuzarliklarning oldini olish va jinoyatchilikka qarshi kurashishga qaratilgan faoliyati oʻrganildi.

Mahallalarda osoyishtalikni taʼminlash, xususan, “qizil” toifadagi hududlarda huquqbuzarliklar profilaktikasi hamda ijtimoiy profilaktik tadbirlarini amalga oshirish, hududlarni raqamlashtirish, kuzatuv kameralar taʼminoti, “Xavfsiz va sogʻlom yurt” tezkor-profilaktik tadbirlarining samaradorligi hamda aholining huquqiy madaniyatini yuksaltirish masalalariga eʼtibor qaratildi.

Mirzachoʻl tumaning “Mustaqillik” mahallasida tashkil qilingan “Hayot maktabi” faoliyati viloyat miqyosida eʼtirof etildi. Maʼlumot oʻrnida, oʻtgan yilning sentyabr oyidan ushbu 600 oʻrinli muassasada oʻrta umumtaʼlim maktablarining 10- va 11-sinf oʻquvchilariga qishloq xoʻjaligi, payvandchilik, tikuvchilik, qandolatchilik kabi 7 ta yoʻnalishda saboq berilmoqda.

Shu bilan birga, Doʻstlik tumani IIB qoshida tuzilgan “Voleybol klubi” hamda yoshlar uchun mazkur sport turi bilan shugʻullanish uchun yaratilgan imkoniyatlar oʻrganilib, yuqori baho berildi.

Oʻrganish jarayonida, Aydar – Arnasoy koʻliga sayyohlarni jalb qilish maqsadida amalga oshirilayotgan chora-tadbirlar bilan tanishildi. Binobarin, hududda mahalliy va xorijiy sayyohlar uchun yaratilgan sharoitlar, xavfsiz va ravon yoʻllar, elektr taʼminoti, shuningdek boshqa infratuzilma obyektlari koʻzdan kechirildi.

Ishchi guruh tomonidan Arnasoy hamda Paxtakor tumanlari Ichki ishlar boʻlimlari shaxsiy tarkibi bilan ham muloqot oʻtkazilib, hududlarda huquqbuzarliklarni barvaqt oldini olish, jinoyatlarni fosh qilish, ichki ishlar organlarining nufuzini oshirishga qaratilgan  masalalar hamda targ'ibot tadbirlariga baho berildi.

Jizzax shahar IIB faoliyatini oʻrganish jarayonida “qizil” toifada qolayotgan mahallalardagi kriminogen vaziyat tahlil qilinib, jinoyatlarning oldini olish hamda mahallalarda kriminogen vaziyatni yaxshilashga qaratilgan ishlar boʻyicha topshiriq va tavsiyalar bildirildi. Shuningdek, Jizzax shahrida tashkil etilgan “Xavfsiz va sogʻlom yurt” tezkor-profilaktik tadbirlar oyligi doirasida tuzilgan devon faoliyati oʻrganilib, masalaga oid tadbirlarni tashkil etish hamda hujjatlarni rasmiylashtirishda aniqlangan nuqsonlarni bartaraf etish choralari belgilandi.

Oʻrganishlar jarayonida viloyat IIB “112” xizmati faoliyati bilan tanishildi. Jarayonda mazkur tizim imkoniyatlari, zamonaviy sharoitda kuzatuv kameralari orqali tezkor vaziyatni nazorat qilish, qidiruvdagi shaxslar va avtoulovlarni aniqlash kabi qator vazifalarni bajaruvchi “Qalqon” platformasining integratsiyasi haqidagi taqdimot bilan tanishildi.

Shuningdek, ishchi guruh aʼzolari tomonidan, Zomin tumanining chegara hududlaridagi mahallalarda xavfsiz muhitni yaratishning tashkiliy-profilaktik asoslarini zamon talablariga moslashtirish, sodir etiladigan qonunbuzilishlarning asl omillarini oʻz vaqtida aniqlash va kompleks chora-tadbirlar bilan manzilli bartaraf etish orqali jinoyatchilikning barvaqt oldini olish tizimining samaradorligini yanada oshirishga qaratilgan ishlar bilan tanishildi.

Xususan, jinoyatlarni fosh qilishda ilgʻor texnologiyalarni qoʻllash, kuzatuv kameralari sonini oshirish va situatsion markazlarga integratsiya qilish, soha vakillarining aholini rozi qilish va ichki ishlar organlarining nufuzini oshirishga qaratilgan faoliyatini kuchaytirish yuzasidan taklif va mulohazalar bayon qilindi.

Shu bilan birga Vazirlik ishchi guruhi turistik rekreatsion zonasi faoliyatini oʻrgandi. Hududda viloyat IIB Xavfsiz turizmni taʼminlash boshqarmasi, favqulodda vaziyatlar tizimi hamda harbiy qism ofitserlari ishtirokida jamoat xavfsizligini taʼminlash, yongʻinlarning oldini olish, aholi va sayyohlar murojaatlari bilan ishlash, qonunbuzarliklarning oldini olish maqsadida profilaktik tadbirlarni kuchaytirish masalalari muhokama qilindi.

Oʻrganishlar chogʻida, Davlat rahbarining mahallalarda jinoyatchilikni jilovlash boʻyicha topshiriqlarini amaliyotga tatbiq etish doirasida masʼullar tomonidan huquqbuzarliklar profilaktikasini har kuni tashkil etish, aholi oʻrtasida jinoyatchilikka nisbatan murosasizlik hissini kuchaytirish choralari koʻrilayotgani hamda jinoyatchilikni mahalla yettiligi ishtirokida “mahallabay” tamoyili asosida jilovlash mexanizmi yaratilgani bir qator hududlarda ijobiy natija berayotganligi alohida qayd etildi.

Ushbu ijobiy jarayonlar viloyatning Jizzax shahar “Doʻstlik” va “Yoshlik” mahallalari, Sharof Rashidov tumanida “Madaniyat” mahallasi, Arnasoy tumanining “Gʻoliblar” mahallasi, Baxmal tumanining “Bogʻishamol” va “Nurafshon” mahallalari, Gʻallaorol tumanidagi “Guliston” mahallasi, Doʻstlik tumanidagi “Bunyodkor” mahallasi, Zarbdor tumanidagi “Adir obod” mahallasi hamda Zafarobod tumanidagi “Pistalkent” mahallalarida jinoyatchilik soni keskin kamayishiga olib kelgan.

Oʻrganish jarayonida, aniqlangan barcha kamchiliklar soha masʼullari ishtirokida tanqidiy muhokama qilinib, kelgusida xizmat faoliyatini takomillashtirishga oid maqsadli chora-tadbirlar belgilab olindi.