Samarqand viloyati Ichki ishlar organlari xodimlari bilan ochiq muloqot: muammolar tinglandi, amaliy yechimlar belgilandi
2025-07-26 15:20:00 / Yangiliklar
Kattaqoʻrgʻon shahar Ichki ishlar boʻlimida Boshqarma boshligʻi polkovnik Rahmat Mamatov tomonidan Paxtachi, Narpay, Ishtixon, Kattaqoʻrgʻon tumani va Kattaqoʻrgʻon shahar IIBlarida xizmat qilayotgan xodimlarning shaxsiy, ijtimoiy va xizmatni oʻtash bilan bogʻliq muammolarini oʻrganish yuzasidan qabul oʻtkazildi.
Unda xodimlarning shaxsiy, ijtimoiy va xizmat faoliyati bilan bogʻliq muammolari bilan yaqindan tanishdi.
Ochiq muloqot tarzida oʻtkazilgan qabulda har bir xodimning murojaati individual tarzda koʻrib chiqildi. Muloqot davomida xodimlar nafaqat xizmat sharoitlari, balki oilaviy masalalar, uy-joy, sogʻliq, xizmatdagi adolatga oid masalalarni ham ochiq bayon qilishdi.
Polkovnik Rahmat Mamatov har bir murojaatni diqqat bilan tinglab, joyida hal etilishi mumkin boʻlgan muammolar yuzasidan masʼullarga aniq koʻrsatmalar berdi. Ayrim masalalar esa chuqur oʻrganilishi va tegishli xizmat tekshiruvlari asosida hal qilinishi uchun nazoratga olindi.
Tadbir davomida aniqlangan ayrim ijtimoiy va tashkiliy muammolar boʻyicha tizimli yondashuv asosida kompleks chora-tadbirlar ishlab chiqilishi, xodimlarga munosib sharoit yaratish, ularning mehnatini qadrlash va ijtimoiy himoyasini mustahkamlash boʻyicha alohida topshiriqlar belgilandi.
Samarqand viloyati IIB Axborot xizmati