Andijon shahrining kriminogen vaziyat ogʻir mahallalarida joriy yilning 6 oyida sodir etilgan jinoyatlar tanqidiy muhokama etildi
2025-07-25 19:55:00 / Yangiliklar
Oʻzbekiston Respublikasi Prezidentining 2025-yil 3-yanvardagi PQ-1-son qarori ijrosini taʼminlash, jinoyatchilikning oldini olish, fuqarolar xavfsizligini taʼminlash hamda mahallalarda xavfsiz muhitni yaratish hamda jamoatchilik nazoratini kuchaytirish maqsadida joriy yilning birinchi yarim yilligida Andijon shahrida amalga oshirilgan ishlar tahlil qilindi.
Xususan, Mustaqillik, Sogʻlom avlod, Oʻzbegim hamda Gʻayrat mahallalarida oʻtgan 6 oy mobaynida sodir etilgan jinoyatlar Andijon viloyati prokurori Murodillo Abduhakimov hamda viloyat IIB boshligʻi Sanjar Djabarovlar raisligida “mahalla yettiligi” aʼzolari, mahalliy davlat hokimiyati va faol jamoatchilik vakillari ishtirokida tanqidiy muhokama oʻtkazildi.
Muloqotlar davomida har bir jinoyat holati atroflicha tahlil qilinib, ularning sodir etilishiga sabab boʻlgan omillar oʻrganildi.
Koʻplab oldini olish mumkin boʻlgan jinoyatlarni sodir etilishiga imkon yaratib, mahallalarda hamkorlikdagi profilaktik tadbirlarni talab darajasida tashkil etmagan “mahalla yettiligi” vakillari va boshqa masʼullarning faoliyati keskin tanqid ostiga olindi.
Shuningdek, mahallalarda profilaktik tadbirlarni kuchaytirish, aholi oʻrtasida huquqiy madaniyatni oshirish, yoshlar oʻrtasida targʻibot ishlarini faollashtirish yuzasidan aniq vazifalar belgilab berildi.
Har bir muhokama yakunlari boʻyicha jinoyatchilikning kamayishiga qaratilgan qoʻshimcha chora-tadbirlar rejasi ishlab chiqildi hamda uning ijrosi qatʼiy nazoratga olindi.
Andijon viloyati IIB Axborot xizmati