IIV Akademiyasi magistraturasida yakuniy davlat attestatsiyasi boʻlib oʻtdi
2025-07-24 09:00:00 / Yangiliklar
Tinglovchilar ichki ishlar organlari xodimlarining kasbiy madaniyati va xizmat intizomi hamda mutaxassislik fanlaridan imtihon topshirib, magistrlik dissertatsiyalarini himoya qildilar.
Imtihonlar Oʻzbekiston Respublikasi Prezidenti Administratsiyasi masʼullari, Ichki ishlar vazirligi sohaviy xizmatlari rahbarlari hamda akademiya professor-oʻqituvchilaridan iborat komissiya tomonidan qabul qilindi.
Aytish joizki, keyingi yillarda magistraturada oʻqitishning ilgʻor yondashuvlari joriy qilindi. Tizim uchun zamonaviy boshqaruv kadrlarini tayyorlash maqsadida tinglovchilarga qoʻyilayotgan talab va mezonlar kuchaytirildi. Xususan, har bir tinglovchining KPI koʻrsatkichini yuritish, fanlarni oʻzlashtirishini muntazam monitoring qilish, rahbarlik qobiliyatini shakllantirib borish va boshqa mexanizmlar yoʻlga qoʻyildi.
Shu bilan birga, magistrlik dissertatsiyalarini hududiy ichki ishlar organlaridan kelib tushgan buyurtmalar asosida tayyorlash, mavjud muammolarning yechimlariga qaratilgan ilmiy asoslantirilgan taklif va tavsiyalarni ishlab chiqib, amaliyotga tatbiq etish tizimi yaratildi.
Yakuniy davlat attestatsiyasida shu kabi muhim barcha mezonlarga alohida eʼtibor qaratildi va tinglovchilarning bilimi xolisona baholandi.
IIV Akademiyasi Axborot xizmati