O‘zbеkiston Rеspublikаsi Ichki ishlаr vаzirligi

Qashqadaryo viloyatida turizm sohasini rivojlantirish, sayyohlarga xizmat koʻrsatish tizimini tubdan yaxshilash, qulay hamda xavfsiz xizmatlar koʻrsatishni yanada kengaytirish boʻyicha tizimli ishlar amalga oshirilmoqda. Jumladan, Shahrisabz tumanining «Miraki», «Uloch», «Polmon» va Amir Temur nomli mahalla fuqarolar yigʻinlari hududidagi umumiy maydoni 240 gektar boʻlgan yer uchastkasida «Shahrisabz» turistik markazi tashkil qilindi.

Turistik markaz bir vaqtning oʻzida 30 ming sayyohni qabul qila oladi. Bu yerda 2 ta mehmonxona, 1 ta xostel, 285 ta oilaviy dam olish maskani, shuningdek, umumiy ovqatlanish joylari, avtoturargohlar, savdo doʻkonlari, 2050 metr uzunlikdagi dor yoʻli, sogʻlomlashtirish markazi, tematik bogʻ, salomatlik yoʻlagi, osma koʻprik, «Hisorak» suv omborini tomosha qilish maydoni, argʻimchoq, ziplayn kabi koʻngilochar obyektlar joylashgan.

Hozirda turistik markazga har kuni oʻrtacha 15 ming nafar sayyoh tashrif buyurmoqda. Kelgusida mazkur koʻrsatkich kuniga 25 mingtani, yiliga oʻrtacha 1 million 100 ming nafarni tashkil etishi kutilmoqda. Bu esa, oʻz navbatida, sayyohlar xavfsizligini samarali va ishonchli taʼminlashni taqozo qiladi.

Qashqadaryo viloyati IIB Xavfsiz turizmni taʼminlash boshqarmasi shaxsiy tarkibi tomonidan mahalliy va xorijiy sayyohlar hamda xorijiy davlat delegatsiyalari vakillarini kutib olish, xavfsizligini taʼminlash va kuzatish ishlari tashkil etilib, tashrif davomida koʻngilsiz holatlarga yoʻl qoʻyilmay kelinmoqda. Turistik markaz direksiyasi mablagʻi hisobidan boshqarma ixtiyoriga 4 nafar xodim ajratilib, 3 ta patrullik yoʻnalishida xizmat olib borilishi yoʻlga qoʻyildi. Xodimlar uchun markaz hududidan xizmat xonasi ajratildi, shuningdek, 3 ta koʻchma mobil post oʻrnatilib, zarur buyumlar bilan jihozlandi.

Sayyohlar xavfsizligini taʼminlash maqsadida turistik markaz hududiga jami 218 ta intellektual videokuzatuv kamerasi oʻrnatilib, barchasi xizmat xonasidagi kuzatuv markazi va «Qalqon» dasturiga integratsiya qilindi. Ayni paytda turistlar ishtirokidagi ommaviy tadbirlarni oʻtkazish jarayonida xavfsizlikni taʼminlash, hududdagi vaziyatni doimiy nazorat qilish uchun uchuvchisiz uchish apparati (dron)dan foydalanib kelinmoqda.

Viloyat Qoʻriqlash boshqarmasi tomonidan markaz hududidagi jami 105 ta, shu jumladan, 62 ta obyekt qoʻriqlovga olinib, 41 ta obyektga «tashvish tugmalari» oʻrnatildi va obyektlarni qoʻriqlashga 12 nafar xodim ajratildi.

Javlonbek Allayev, kapitan.
Sodiq Rahimov, oʻz muxbirimiz. “Postda”
Qashqadaryo viloyati