IIV Akademiyasiga Turkiya milliy politsiya akademiyasi huzuridagi Yoʻl harakati xavfsizligi instituti rahbari Shenol Yaprak boshchiligidagi delegatsiya keldi
2024-03-06 10:35:00 / Yangiliklar
Ikki tomonlama muloqotda Oʻzbekiston – Turkiya oʻrtasidagi oʻzaro hurmat va yuksak ishonchga asoslangan munosabatlarning bugungi holati yuzasidan fikr almashildi. Xalqlarimizni bogʻlab turgan azaliy qardoshlik rishtalari hamkorlik aloqalarining hozirgi bosqichida mustahkam poydevor boʻlayotgani eʼtirof etildi.
Akademiya rahbari Rustam Xatamov soʻnggi yillarda mamlakatlarimiz munosabatida yangi davr boshlangani va bu barcha sohalarda yaqqol koʻzga tashlanayotganini alohida taʼkidladi. Ayniqsa Turkiya Respublikasining turdosh oliy taʼlim muassasalari bilan tajriba almashinuvining sezilarli darajada faollashgani aytib oʻtildi.
Oʻz navbatida, Shenol Yaprak aloqalarni yanada rivojlantirishdan mamnunligini bildirdi. “Qardosh mamlakatlar oʻrtasidagi munosabatlarning nafaqat buguni, balki kelajagi ham porloqdir. Samimiy doʻstlik ruhida oʻtayotgan uchrashuv bunga dalolat beradi. Biz aloqalarni yangi mazmun bilan boyitish va bir-birimizni qoʻllashga doimo tayyormiz”, dedi u.
Qizgʻin muloqotdan soʻng mehmonlar akademiya faoliyati bilan yaqindan tanishdilar. Taʼlim jarayoniga tatbiq qilingan ilgʻor yondashuv va tajribalar, ichki ishlar organlari uchun rahbar kadrlar tayyorlashning ustuvor yoʻnalishlari, xalqaro hamkorlik aloqalarining bugungi holati yuzasidan maʼlumot berildi.
Turkiyalik mehmonlar oʻquv dargohining ulkan salohiyati va istiqbolini eʼtirof etib, amaliy hamkorlikni har tomonlama davom ettirishga ishonch bildirdilar.
IIV Akademiyasi Axborot xizmati