Namangan viloyati hududlarida jinoyatchilikni oldini olish borasidagi amalga oshirilgan ishlar va sodir etilgan jinoyatlarning kelib chiqish sabablari oʻrganilmoqda
2025-07-22 11:05:00 / Yangiliklar
Namangan viloyati IIB rahbariyati tomonidan jinoyatchilikning oldini olishda quyi tizim xodimlarining faoliyatini oʻrganish ishlari tizimli ravishda davom etib, bu jarayon ichki ishlar organlarining aholiga xizmat koʻrsatish samaradorligini oshirishda muhim ahamiyat kasb etmoqda.
Boshqarma rahbariyati boshchiligidagi ishchi guruh Yangiqoʻrgʻon tumanida boʻlib, tuman hokimi va prokurori ishtirokida “Choʻngbagʻish” hamda “Qorapolvon” mahallalari, tuman markazida yoʻl infratuzilmasini yaxshilash boʻyicha amalga oshirilayotgan ishlar hamda ichki ishlar boʻlimi xodimlarining faoliyati atroflicha oʻrganildi.
Oʻrganishlar davomida, mahallalarda sodir etilgan ogʻir va oʻta ogʻir oila-turmush doirasidagi jinoyatlarning kelib chiqish sabablari chuqur tahlil qilinib, bunday holatlarni oldini olishda sustkashlikka yoʻl qoʻygan masʼullarning faoliyati keskin tanqid qilindi.
Shuningdek, tuman markazida yoʻl infratuzilmasini yaxshilash va tirbandliklarni oldini olish, piyodalar hamda haydovchilarga qulayliklar yaratish boʻyicha loyiha taklifi bilan tanishilib, mutaxassislarga aniq koʻrsatmalar berildi.
Bundan tashqari, ichki ishlar boʻlimi xodimlarning faoliyati ham oʻrganilib, aniqlangan kamchiliklarni zudlikda bartaraf etish, jinoyatchilik hamda huquqbuzarlarning oldini olish, mahallalarda xavfsiz muhitni shakllantirish borasidagi aniq vazifalar belgilab olindi.
Namangan viloyati IIB Axborot xizmati