Qashqadaryo viloyatida Ichki ishlar vazirligi Jamoat xavfsizligi departamenti Yoʻl harakati xavfsizligi xizmati rahbariyatining sayyor qabuli tashkil etildi
2025-07-18 17:00:00 / Yangiliklar
Fuqarolarning murojaatlarini tinglash asnosida joylarda yigʻilib qolgan muammolarni bartaraf etish bugun har bir rahbar oldiga oʻyilgan asosiy vazifalardan biri.
Shu bois, yurtimizning barcha hududlarida belgilangan rejaga muvofiq Davlat yoʻl harakati xavfsizligi rahbariyatining ham sayyor qabullari oʻtkazilib kelinmoqda.
Bu galgi qabul Qashqadaryo viloyatining Qarshi shahrida tashkil etildi.
Qabul davomida taʼlim muassasalari yoni va serqatnov yoʻllarga piyodalar oʻtish joyi, yoʻl belgilari, svetofor, qavariq piyodalar oʻtish joylarini tashkil etib berish, qoidabuzarlik uchun belgilangan jarima qarorlarini qayta koʻrib chiqish, tirbandliklarni bartaraf etish uchun “aqlli chorraha“lar bunyod etish, trotuarlar qurish singari mavzulardagi jami 19 ta murojaatlardan 5 tasi joyida ijobiy hal etildi, 3 ta murojaat yuzasidan tegishli huquqiy tushuncha berildi, qolgan 11 ta murojaatlar boʻyicha kompleks oʻrganish talab etilishi tufayli ijrosini nazoratga olish va yechimini taʼminlash boʻyicha maxsus vazifalar yuklatildi.
Masʼul rahbarlarga murojaatlar yuzasidan tezkor va samarali choralar koʻrish, har bir fuqaroning muammosiga qonunchilik va adolat asosida yondashish boʻyicha qatʼiy topshiriqlar berildi.
IIV Jamoat xavfsizligi departamenti Yoʻl harakati xavfsizligi xizmati Axborot xizmati