Qoʻshsahifada — Sirdaryo viloyati. Uyda tinchi boʻlsin ayolning
2025-07-18 23:00:00 / Yangiliklar
Nazirjon imkon darajasida farzandlari va jiyanlarini kam-koʻstsiz qilishga harakat qiladi. Kirakashlik qilib topganini uyiga tashiydi.
Lekin xotini bilan opasi oʻrtasida jiddiy kelishmovchilik bor. Xotini qaynopasining qaytib kelganidan norozi. Opa esa, oʻz ota uyimdamanku, deb oʻzini himoya qiladi.
Nazirjon “bosh yorilsa, doʻppi ostida” degan naqlga amal qilib, oiladagi mojaroni koʻchaga olib chiqmaslikka harakat qilib koʻrdi. Lekin baʼzan tong otguncha choʻziladigan mojaroga qoʻshnilar, profilaktika inspektori bosh qoʻshishga majbur boʻldi.
Ana shunday janjallardan biriga tuman IIB HPB xotin-qizlar masalalari boʻyicha katta inspektori, katta leytenant Mahliyo Hamroyeva aralashdi.
U avvaliga ogʻir-vazminlik bilan masalani atroflicha surishtirdi. Hamma bilan birma-bir suhbatlashdi. Bolalarning oʻqishi bilan qiziqdi. Keyin esa turmushi buzilgan opani olib chiqib ketdi.
U oʻsha kuni tuman hokimligida boʻlib, masʼullar bilan uchrashdi. Vaziyatni tushuntirdi, maslahatlashdi.
Saʼy-harakatlar samara berib, ikki farzandli ayolga koʻp qavatli uylardan subsidiya asosida kvartira ajratiladigan boʻldi. Oradan bir oylar oʻtgach, barcha hujjatlar rasmiylashtirildi.
Yangi xonadonga koʻchib kirgan ayolning quvonchini soʻz bilan taʼriflashning iloji yoʻq. Bu orada u Mahliyo Hamroyevaning tashabbusi bilan tikuvchilik sexiga ishga joylashtirilgan, topish-tutishiga baraka engandi.
Asli fargʻonalikman, taqdir meni Sirdaryoning Xovosi bilan tutashtirgan, — deydi lavhamiz qahramoni. — Qariyb uch yildirki, hozirgi lavozimimda ishlab kelyapman.
Notinch oilalarda boʻlganimda, mojarolarning asl sabablarini aniqlashga harakat qilaman.
Shunga koʻra, mutasaddi tashkilotlar vakillari, “mahalla yettiligi”, kayvoni onaxonlar, qolaversa, tajribali ustozlarim koʻmagida muammolarni bartaraf etishga kirishaman.
Mahliyo Hamroyeva joriy yilning oʻzida buzilish arafasida turgan 18 ta oilani saqlab qolishga muvaffaq boʻldi.
Demakki, shuncha oilaga oʻzaro ishonch va hurmat, osoyishtalik, xotirjamlik qaytdi.
©️ “Postda” gazetasi, Sirdaryo viloyati.