Ichki ishlar vazirligi rahbariyati boshchiligida Transport va turizm obyektlarida xavfsizlikni taʼminlash departamentida 6 oylik faoliyati sarhisob qilindi
2025-07-18 09:00:00 / Yangiliklar
Ichki ishlar vaziri oʻrinbosari, general-mayor Baxodir Mirzaraximov huzurida Transport va turizm obyektlarida xavfsizlikni taʼminlash departamentida jinoyat va huquqbuzarliklarning oldini olish borasida amalga oshirilgan ishlar, yoʻl qoʻyilgan xato va kamchiliklar, kelgusidagi ustuvor vazifalar hamda II chorak yakunlari muhokamasiga bagʻishlangan yigʻilish oʻtkazildi.
Tanqidiy-tahliliy ruhda oʻtgan mazkur yigʻilishda Departament hamda Boshqarma boshligʻining oʻrinbosarlari, sohaviy xizmat, joylardan videokonferensiya studiyalari orqali tarmoqlar rahbarlari hamda shaxsiy tarkibi ishtirok etishdi.
Dastlab, Departament xizmat hududida huquqbuzarlik va jinoyatchilikning barvaqt oldini olish borasida amalga oshirilgan ishlar, ichki ishlar boʻlimlari va sohaviy xizmatlar faoliyati tahlil qilindi. II chorak davomida viloyat hududida kriminogen vaziyatni yanada yaxshilash, jinoyat va huquqbuzarliklarga qarshi kurashish, jamoat tartibini saqlash, transport obyektlarida xavfsiz muhitni yaratish borasida amalga oshirilgan ishlar, erishilgan yutuqlar, yoʻl qoʻyilgan kamchiliklarga alohida toʻxtalib oʻtildi. Shuningdek, jinoyatchilikning ayrim turlari oshgan hudud masʼul rahbarlarining faoliyati jiddiy tanqid ostiga olindi va bu borada amalga oshirilishi lozim boʻlgan tezkor-profilaktik tadbirlarni yanada kuchaytirish yuzasidan topshiriqlar berildi.
Yigʻilish yakunida Oʻzbekiston Respublikasi Ichki ishlar vaziri oʻrinbosari soʻz olib, Vazirlik rahbariyati tomonidan berilgan vazifa va topshiriqlarni barcha shaxsiy tarkib alohida namuna koʻrsatgan holda vijdonan bajarishi lozimligi, fuqarolar xavfsizligini taʼminlashda bor bilim va salohiyatini namoyon qilish, yangicha dunyoqarash bilan xalqimiz xizmatida boʻlishlari lozimligi, tamagirlik va mansab vakolatlarini suiisteʼmol qilmaslik, korrupsion holatlarga yoʻl yoʻl qoʻymaslik, fuqarolardan kelib tushgan murojaatlarni oʻz vaqtida va qonuniy tartibda koʻrib chiqishlari muhimligi aytildi.
Kelgusida transport va turizm obyektlarida jinoyatchilikni oldini olish, yurtimizga tashrif buyurayotgan turistlar, yoʻlovchi fuqarolar tinchligi, osoyishtaligini taʼminlash borasida chora-tadbirlar belgilanib, zarur topshiriqlar berildi va tegishli qarorlar qabul qilindi.
IIV Transport va turizm obyektlarida xavfsizlikni taʼminlash departamenti Axborot guruhi