Ichki ishlar vazirligi rahbariyati ishtirokida Qoraqalpogʻiston Respublikasi Ichki ishlar vazirligining 6 oylik faoliyati sarhisob qilindi
2025-07-17 10:40:00 / Yangiliklar
Qoraqalpogʻiston Respublikasi Ichki ishlar vazirligida Oʻzbekiston Respublikasi Ichki ishlar vaziri oʻrinbosari general-mayor Davron Nazarmuhammedov ishtirokida joriy yilning 6 oyi davomida amalga oshirilgan ishlar, yoʻl qoʻyilgan kamchiliklar muhokamasiga bagʻishlangan yigʻilish oʻtkazildi.
Tadbirda Qoraqalpogʻiston Respublikasi Ichki ishlar vaziri polkovnik Baxtiyar Torebekov, ichki ishlar vazirining oʻrinbosarlari, barcha sohaviy xizmat rahbarlari, shahar-tuman ichki ishlar boʻlimlari boshliqlari, ularning oʻrinbosarlari, boʻlinma boshliqlari hamda tegishli mutasaddi xodimlar ishtirok etdilar.
Yigʻilishda Qoraqalpogʻiston Respublikasi Ichki ishlar vazirining birinchi oʻrinbosari tomonidan oʻtgan olti oy davomida Qoraqalpogʻiston Respublikasida jinoyatchilikni jilovlash, huquqbuzarliklarga qarshi kurashish, jamoat tartibini saqlash, yoʻl-harakati xavfsizligini taʼminlash borasida amalga oshirilgan ishlar yuzasidan hisobot berildi.
Jinoyatchilikning ayrim turlari oshgan hudud mutasaddi rahbarlariga bu borada amalga oshirilishi lozim boʻlgan tadbirlar xususida koʻrsatma hamda topshiriqlar berildi. Tadbirda Oʻzbekiston Respublikasi Ichki ishlar vaziri oʻrinbosari soʻzga chiqib, korrupsiya va tamagirlikka yoʻl qoʻymaslik, xizmat intizomi va qonuniylikka rioya qilish borasida qatʼiy talab va topshiriqlarni yetkazdi.
Tadbir yakunida Qoraqalpogʻiston Respublikasi hududida jamoat tartibini saqlash, fuqarolar xavfsizligini taʼminlash, jinoyatchilikni jilovlashda hamkasblariga har tomonlama oʻrnak boʻlayotgan bir guruh xodimlarga pul mukofotlari topshirildi.
Qoraqalpogʻiston Respublikasi IIV Axborot xizmati