O‘zbеkiston Rеspublikаsi Ichki ishlаr vаzirligi

Ichki ishlar vazirining farmoyishiga asosan, Respublika boʻyicha, jumladan Toshkent viloyatida giyohvandlik vositalari va psixotrop moddalarining noqonuniy aylanishiga, shuningdek ularni saqlash, isteʼmol qilish, yetishtirish hamda realizatsiya qilish holatlarini aniqlash va oldini olishga qaratilgan “Qoradori – 2025” keng qamrovli tezkor-profilaktik tadbirning birinchi bosqichi amalga oshirildi.

Ushbu tadbir aholi, ayniqsa, yoshlar oʻrtasida sogʻlom turmush tarzini qaror toptirish, mamlakatimiz fuqarolari salomatligini muhofaza qilish, kuchli taʼsir qiluvchi moddalar va giyohvandlik vositalarining tarqalishiga chek qoʻyishga qaratildi.

Tadbir doirasida Toshkent viloyatida ichki ishlar organlarining barcha sohaviy xizmatlari jalb etilgan holda tizimli ishlar amalga oshirildi. Giyohvandlik vositalarining qatʼiy nazorati va hamkorlikdagi harakatlari natijasida qator jinoyatlar fosh etildi.

Jumladan, tadbirning birinchi bosqichi davomida 54 kilogramm 190 gramm giyohvandlik moddalari hamda 19 ming 369 dona kuchli taʼsir qiluvchi dori vositalari muomaladan olindi. Shuningdek, 7 ming 655 tup giyohvandlik oʻsimliklari aniqlanib, belgilangan tartibda yoʻq qilindi.

Aniqlangan jinoyatlarning 89 tasi giyohvand moddalarni oʻtkazish, 137 tasi saqlash, 147 tasi yetishtirish, 10 tasi kontrabanda boʻlsa, 26 tasi kuchli taʼsir qiluvchi dori vositalarining noqonuniy muomalasi bilan bogʻliq holatlarni tashkil etdi.

Hurmatli fuqarolar!

Agar siz giyohvandlik vositalari bilan bogʻliq shubhali holatlardan xabardor boʻlsangiz, darhol 102 qisqa raqami orqali yoki yaqin oradagi ichki ishlar organlariga murojaat qilishingizni soʻraymiz. Shuningdek, Telegram ijtimoiy tarmogʻidagi “@stopnarko_bot” boti orqali ham murojaat qoldirishingiz mumkin. Murojaat etuvchining shaxsi toʻliq sir saqlanishi kafolatlanadi.

Toshkent viloyatida giyohvandlikka qarshi kurash tezkor, tizimli va manzilli tarzda davom ettirilmoqda.

Toshkent viloyati IIBB Axborot xizmati