“Kibermakonda sodir etilayotgan jinoyatlarning oldini olish boʻyicha ustuvor vazifalar” mavzusida matbuot anjumani oʻtkazildi
2025-07-16 09:35:00 / Yangiliklar
Oʻzbekiston Respublikasi Prezidentining 2025-yil 30-apreldagi qarori ijrosi yuzasidan joriy yilning 14-20-iyul kunlari Samarqand viloyatida «Kibermakonda sodir etilayotgan jinoyatlarning oldini olish boʻyicha targʻibot-tashviqot haftaligi tadbirlari oʻtkazilmoqda.
“Ipak yoʻli” turizm va madaniy meros xalqaro universitetida boʻlib oʻtgan matbuot anjumanida IIV Kiberxavfsizlik markazi hamda “Yagona umumrespublika protsessing markazi” AJ “Uzcard” masʼul xodimlari tomonidan keyingi vaqtda kibermakonda sodir etilayotgan jinoyatlar, ularning oldini olish va fuqarolarning bu boradagi bilim va tushunchalarini oshirish yuzasidan keng tushuntirishlar berildi.
Tobora rivojlanib borayotgan axborot texnologiyalari hayotimizning barcha jabhalarida kompyuter va raqamlashtirilgan turli xil texnikalar va yangiliklarni omma orasiga olib kirmoqda. Mazkur yoʻnalishlar rivojlangani sari bundan notoʻgʻri maqsadlarda foydalanuvchilar soni ham kun sayin ortib borayotgani sir emas.
Bugun sodir etilayotgan jinoyatlar orasida boshqalariga qaraganda internet va kompyuter texnologiyalari bilan bogʻliq jinoyatlar nisbati keskin oshib bormoqda.
Kiberjinoyatlarning oldini olish qolaversa aholini kibermakondagi tahdidlardan ogoh boʻlishi borasidagi tushunchalarini oshirish maqsadida oʻtkazilayotgan mazkur yoʻnalishdagi targʻibot-tashviqot tadbirlari keng koʻlamda davom etmoqda.
Samarqand viloyati IIB Axborot xizmati