Kasb fidoyilari: Tajribada gap koʻp
2024-03-02 23:55:00 / Yangiliklar
Dilshod akasi, hozirda Milliy gvardiya Toshkent shahar Qoʻriqlash boshqarmasida xizmat qilayotgan serjant Yoqub Shonazarovga havas bilan ulgʻaydi. Chiroqchi tumanidagi 131-sonli maktabni bitirgach, harbiy xizmatni oʻtadi. Soʻng ichki ishlar organlarida xizmat qilish uchun Qashqadaryo viloyati IIBga hujjat topshirdi. Sinovlardan oʻtib, 2003-yilda viloyat IIB Qoʻriqlash boshqarmasi “Talimarjon” AMBda xizmatni boshladi. Kasb sirlarini ustozi — serjant Xursand Bobojonovdan oʻrgandi. Olgan saboqlari xizmat davrida asqatdi.
Kichik serjant D.Shonazarov oʻtgan yillar davomida burchga sodiqligi, sergakligi va xushmuomalaligi, topshiriqlarni kam-koʻstsiz bajarishi bilan hamkasblari oʻrtasida hurmat qozondi.
Bugungi kunda viloyat IIB nazorat-oʻtkazish punkti nazoratchisi vazifasida ishlayotgan lavhamiz qahramoni boshqarmaga kelgan fuqarolarga murojaati boʻyicha yoʻnalish berish, ish bilan shahar-tumanlardan kelgan xodimlarning binoga kirib chiqishini nazorat qilishda faollik koʻrsatmoqda.
- Boshqarmaga har xil toifadagi, turli tabiatli insonlar murojaat etib kelishadi, — deydi kichik serjant Dilshod Shonazarov. — Masalan, ayrim fuqarolar jahl otiga minib keladi. Ularga toʻgʻri muomala qilish, tushuntirish orqali har qanday masalaga yechim topish mumkin. Bu jarayonda menga koʻp yillik tajribam juda qoʻl keladi.
Kechagi shogird bugun yoshlarning ustozi. Dilshod Shonazarovdan bugun koʻpgina shogirdlari maslahat olib turishadi. Nazorat-oʻtkazish punkti nazoratchilari — safdorlar A.Ziyodov va B.Shodiyev uni ustoz deya eʼzozlashadi.
Kichik serjant Dilshod Shonazarov 4 nafar farzandni el koriga kamarbasta qilib tarbiyalamoqda. Oʻgʻli Ramazon Gubkin nomidagi universitetning Toshkent filialida taʼlim olmoqda.
Sodiq RAHIMOV, oʻz muxbirimiz.
Qashqadaryo viloyati