Qoraqalpogʻiston Respublikasi tumanlarida “mahalla yettiligi” tizimi vakillari uchun sayyor mashgʻulotlar oʻtkazildi
2025-07-15 09:00:00 / Yangiliklar
Mashgʻulotlarga 2024-yil yakunlari boʻyicha “yashil” toifaga kiritilgan 174 ta mahalladan “yettilik tizimi” vakillari, shu jumladan, mahalla raislari, hokim yordamchilari, yoshlar yetakchilari, xotin-qizlar faollari, profilaktika inspektorlari, ijtimoiy xodimlar hamda soliq inspektorlari jalb qilindi.
IIV Akademiyasi professor-oʻqituvchilari tomonidan davlatimiz rahbarining “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”, shuningdek Vazirlar Mahkamasining “Obod va xavfsiz mahalla” tamoyili asosida mahallalarda ijtimoiy profilaktika tizimi samaradorligini oshirish chora tadbirlari toʻgʻrisida»gi qarorlari mazmun-mohiyati atroflicha tushuntirildi.
Interfaol tarzda oʻtgan mashgʻulotlar davomida soha xodimlari “mahalla yettiligi” ishini samarali tashkil qilish, hududlarda jinoyatchilikni jilovlash, kriminogen vaziyatga salbiy taʼsir koʻrsatayotgan omillarni aniqlash va bartaraf etish, ijtimoiy profilaktika tadbirlarini samarali tashkil etish yuzasidan zarur bilim va koʻnikmalarga ega boʻldi.
IIV Akademiyasi Axborot xizmati