Qashqadaryo viloyati ichki ishlar boshqarmasida joriy yilning oʻtgan olti oy yakuniga bagʻishlangan tahliliy yigʻilish boʻlib oʻtdi
2025-07-15 09:00:00 / Yangiliklar
Unda Ichki ishlar vaziri oʻrinbosari polkovnik Ramazon Ashropov, vazirlik huzuridagi Migratsiya va personallashtirish departamenti boshligʻi polkovnik Ulugʻbek Tashxodjayev, viloyat ichki ishlar boshqarmasi boshligʻi polkovnik Abduvoxid Ismoilov, boshqarma boshligʻi oʻrinbosarlari, barcha sohaviy xizmat rahbarlari, shahar-tuman ichki ishlar boʻlimlari boshliqlari, ularning oʻrinbosarlari, boʻlinma boshliqlari shuningdek, shahar-tuman ichki ishlar boʻlimlari shaxsiy tarkibi videoselektor orqali qatnashdi.
Yigʻilishda Qashqadaryo viloyati ichki ishlar boshqarmasi boshligʻining birinchi oʻrinbosari, polkovnik Baxtiyor Rajapovning joriy yilning oʻtgan olti oyi davomida viloyatda jinoyatchilikni jilovlash, huquqbuzarliklarga qarshi kurashish, jamoat tartibini saqlash, yoʻl-harakati xavfsizligini taʼminlash borasida amalga oshirilgan ishlar yuzasidan hisoboti tinglandi.
Oʻzbekiston Respublikasi Ichki ishlar vaziri oʻrinbosari soʻzga chiqib, davlatimiz rahbarining joriy yil 3-yanvar kunidagi PQ — 1 — son qarori talablarini ijro etish va amaliyotga keng joriy etish bugungi kun talabi ekanligini taʼkidladi.
Ichki ishlar organlari xodimlari tomonidan korrupsiya va tamagirlikka yoʻl qoʻymaslik, xizmat intizomi va qonuniylikka rioya qilish borasida rahbariyatning qatʼiy talab va topshiriqlarini xodimlarga yetkazdi.
Tanqidiy ruhda oʻtgan yigʻilishda viloyatda jamoat tartibini saqlash, qonun ustuvorligini taʼminlash, mol-mulk daxlsizligi, yoʻl harakati xavfsizligini taʼminlash borasida shahar-tuman ichki ishlar boʻlimlari boshliqlarining hisobotlari eshitildi.
Tahliliy yigʻilishda ichki ishlar organlari xodimlarining faoliyatda erishgan yutuqlari bilan birga yoʻl qoʻyilgan kamchiliklar muhokama qilinib, jinoyatchilikning ayrim turlari oshgan shahar-tuman ichki ishlar boʻlimlari rahbarlariga bu borada amalga oshirilishi lozim boʻlgan chora-tadbirlar xususida koʻrsatma hamda topshiriqlar berildi.
Xizmat davomida kamchiliklarga yoʻl qoʻygan sohaviy xizmatlarning ayrim xodimlari faoliyati muhokama etilib, tegishli chora-tadbirlar belgilandi.
Yakunda viloyat ichki ishlar boshqarmasi boshligʻi polkovnik Abduvoxid Ismoilov viloyatda jamoat tartibini saqlash, jinoyatchiAlikka qarshi kurashish va uning oldini olish, sodir etilgan jinoyatlarni “issiq izlar”da fosh etish, fuqarolar xavfsizligini taʼminlash borasida amalga oshirilgan ishlarni atroflicha tanqidiy tahlil etib, jinoyatlarni fosh etishda tezkor va sohaviy xizmatlar xodimlarining boshqa huquqni muhofaza qiluvchi idoralar hamda keng jamoatchilik bilan oʻzaro hamkorlikdagi faoliyatini yanada kuchaytirish lozimligi ishtirokchilarga uqtirildi.
Prezidentimizning “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi Qarorini amaliyotga keng joriy etish maqsadida viloyatda jinoyatlar va huquqbuzarliklarni barvaqt profilaktikasi borasidagi ishlarni kompleks tashkil etish hamda Dastur va hududiy “yoʻl xaritalari” ishlab chiqilib, amaliyotga joriy etilgani qayd etildi.
Viloyatning qizil toifaga kiruvchi mahallalarida jamoat tartibini saqlash, huquqbuzarliklar va jinoyatlarni oldini olish borasida sustkashlikka yoʻl qoʻygani uchun bir guruh masʼul xodimlar ogohlantirilib, bu boradagi ishlarni yanada jadallashtirish borasida tegishli sohaviy xizmatlar rahbarlari vazifador etilib, masʼuliyati oshirildi.
Kengaytirilgan yigʻilishda yoʻl qoʻyilgan kamchiliklar oshkora muhokama etilib, kun tartibiga kiritilgan masalalar yuzasidan tegishli qaror qabul qilindi.
Qashqadaryo viloyati IIB Axborot xizmati