Surxondaryo viloyati ichki ishlar organlari faxriysi marhum isteʼfodagi polkovnik Abdusamat Bozorboyev xotirasiga bagʻishlab “Uy muzeyi” tashkil etildi
2025-07-13 10:00:00 / Yangiliklar
Kuni kecha ichki ishlar organlarida uzoq yillar samarali xizmat olib borgan, ichki ishlar organi faxriysi, marhum ustoz isteʼfodagi polkovnik Abdusamat Bozorboyevning yashagan xonadonlarida ularning yorqin xotirasiga bagʻishlab tashkil etilgan “Uy muzeyi”ning ochilish marosimi tashkil etildi.
Ushbu uy muzeyi ochilish marosimida viloyat ichki ishlar boshqarmasi rahbariyati, faxriy ustozlar, yosh xodimlar, oʻquvchi va kursantlar hamda marhum Abdusamat Bozorboyevning farzandlari oila aʼzolari ishtirok etishdi.
Tashkil etilgan ushbu uy muzeyini ochish bahonasida, ustozning shogirdlari ularni xotirlashar ekan, ustozning uzoq yillik mazmunli hayoti va xizmat faoliyati davomida toʻplagan maʼlumotlari, erishgan yutuqlari, xizmat davridagi oʻziga xos qiyinchilik va mashaqqatlari haqida soʻzlab berishdi.
Tadbirda, viloyat ichki ishlar boshqarmasi boshligʻi oʻrinbosari podpolkovnik Sherzod Shadiyev ishtirok etib, ushbu uy muzeyini ochilishi hech shubhasiz, ichki ishlar organlari faxriy ustozlari hamda yosh xodimlar oʻrtasida oʻzaro hamkorlikni “yangi bosqich”ga olib chiqib, faxriyning boy hayotiy va xizmatdagi tajribalarini yoshlar oʻrganishi ortida xodimlarda vatanga, kasbiga sadoqat tuygʻularini yanada kamol toptirishda muhim ahamiyat kasb etishini, bundan buyon faxriylar hamda yosh xodimlar oʻzaro hamkorlikdagi amalga oshiriladigan ishlar, shuningdek, ularni har tomonlama qoʻllab-quvvatlash masalalari doimgidanda koʻproq eʼtibor markazida boʻlishini taʼkidlab oʻtdi.
Albatta tashkil etilgan ushbu uy muzeyi marhum ustozlarning nomini abadiylashtirish bilan birga, yosh avlod ongida ustozlarga boʻlgan hurmat, Vatanga boʻlgan muhabbat tuygʻularini yanada oshirishda muhim ahamiyat kasb etadi.
Surxondaryo viloyati IIB Axborot xizmati