Ogohlik. Qurol oʻyinchoq emas
2025-07-12 23:00:00 / Yangiliklar
Jizzax viloyati IIB JXX JTSB xodimlari hududiy profilaktika inspektorlari bilan hamkorlikda fuqarolarga tegishli ov qurollarining saqlanishini oʻrganib borish maqsadida joriy yilning oʻtgan davrida ov quroliga ega 2 ming 161 kishiga oʻqotar qurollarni saqlash va qoʻllashga oid tushuntirishlar berildi.
Shunga qaramasdan, ayrim shaxslar ov qurolini saqlash bilan bogʻliq meʼyorlarni buzishyapti.
Jumladan, soha vakillari Jizzax shahrining “Ravalliq” mahallasida istiqomat qiluvchi X.A. ov quroli va oʻq-dorilarni bir joyda saqlayotganini aniqlab, miltigʻini rasmiylashtirib olishdi.
Mazkur xatti-harakati uchun sud huquqbuzarga nisbatan bazaviy hisoblash miqdorining 5 barobari miqdorida jarima tayinladi.
Umuman olganda, yil boshidan buyon qurolni saqlash va olib yurish qoidalari hamda ruxsatnoma muddatini buzganligi uchun 442 nafar shaxsga nisbatan maʼmuriy bayonnoma rasmiylashtirilib, ulardan belgilangan miqdorda jarima undirilishi taʼminlangan.
Ichki ishlar organlari xodimlari 17 ta qurol hamda 284 ta oʻq-dori saqlash bilan bogʻliq qonunbuzarliklarni aniqlagan.
Oʻz navbatida, 16 nafar shaxs jinoiy javobgarlikka tortildi.
Shuningdek, 56 ta oʻqotar qurol noqonuniy muomaladan olindi.
Qolaversa, soha vakillari tashviqoti sabab 42 kishi oʻqotar qurollarini topshirdi. Ushbu qurollarning 29 tasi pnevmatik miltiqlardir.
Qisqasi, qurol tugʻdirishi mumkin boʻlgan xavflarning oldini olish uchun barcha imkoniyatlar ishga solinayotir.
©️ “Postda” gazetasi, Alijon Abdusattorov, Jizzax viloyati.