Faoliyat samaradorligi yoʻlida. Jazoni ijro etish muassasalari navbatchilik qismlari uchun 10 dona “Damas” avtomashinalari topshirildi
2025-07-09 10:00:00 / Yangiliklar
Jamiyatda tinchlik va xavfsizlikni taʼminlash, shu jumladan, jazoni ijro etish muassasalarida tartib-intizomni mustahkamlash – bu sohadagi har bir tizim boʻgʻinining samarali faoliyatiga bogʻliq.
Jazoni ijro etish muassasalaridagi navbatchilik qismlari esa aynan shu vazifalarni kunu-tun, uzluksiz va yuqori masʼuliyat bilan bajarayotgan boʻlimlardan biridir.
Ularning samarali ish faoliyati, avvalo, tegishli moddiy-texnika bazasiga, zamonaviy transport vositalari va uskunalar bilan taʼminlanganlik darajasiga bogʻliq.
Shu maqsadda, Jazoni ijro etish departamenti tomonidan tizim faoliyatini yanada samarali tashkil etish, navbatchilik qismlarining harakatchanligini oshirish va favqulodda holatlarda tezkor harakat qilish imkoniyatlarini kuchaytirish yoʻlida muhim qadam qoʻyildi.
Xususan, Departamentning byudjetdan tashqari mablagʻlari hisobidan 10 dona “Damas” avtotransport vositasi xarid qilindi.
Ushbu yangi avtomashinalar Departament tizimidagi 10 ta manzil-koloniyaning navbatchilik qismlariga topshirildi.
Bu esa muassasalardagi ichki tartibni taʼminlash, mahkumlar xavfsizligini nazorat qilish va zarurat tugʻilganda tezkor xizmat koʻrsatish imkoniyatlarini yanada kengaytirdi.
Mazkur qadam tizimdagi islohotlarning amaliy ifodasi sifatida, jazoni ijro etish muassasalarida xizmat olib borayotgan xodimlarning ish sharoitlarini yaxshilash, ularni qoʻllab-quvvatlash va ularga boʻlgan eʼtiborni oshirishda muhim ahamiyat kasb etadi.
IIV Jazoni ijro etish departamenti Axborot xizmati