IIV Akademiyasida ichki ishlar organlarining voyaga yetmaganlar masalalari boʻyicha psixolog-inspektorlari uchun oʻquv yigʻini tashkil qilindi
2025-07-09 09:00:00 / Yangiliklar
Xodimlarning kasbiy bilim va koʻnikmalarini oshirish, faoliyatga zamonaviy yondashuvlarni joriy qilish, hududlarda ilgʻor tajribalarni yaratish orqali voyaga yetmaganlar bilan ishlash tizimini tubdan takomillashtirish oʻquv yigʻinidan koʻzlangan asosiy maqsaddir.
Yigʻin doirasida psixolog-inspektorlar uchun “yuridik psixologiya”, “kasbiy psixologiya”, “fuqarolar bilan muloqot” oʻquv modullari, shuningdek “Oila-mahalla-maktab” tamoyili asosida manzilli ishlash metodikasi boʻyicha mashgʻulotlar oʻtkaziladi. Faoliyatdagi muammolar tahlil qilinib, ularning ilmiy-amaliy yechimlari ishlab chiqiladi.
Bundan tashqari, xodimlarning kasbiy, jangovar-jismoniy va saf tayyorgarligini oshirish, ular ishtirokida maʼnaviy-maʼrifiy tadbirlar oʻtkazish rejalashtirilgan.
Oʻquv yigʻini 26-iyulga qadar davom etadi va yakunda tinglovchilardan sinovlar qabul qilinadi.
IIV Jamoat xavfsizligi departamenti Axborot xizmati