Fargʻona viloyatida giyohvandlikka qarshi kurash masalalari yuzasidan davra suhbati tashkil etildi
2025-07-09 09:00:00 / Yangiliklar
Oʻzbekiston Respublikasi Prezidenti Administratsiyasi huzuridagi Narkotiklarni nazorat qilish milliy markazi direktori oʻrinbosari Shavkatjon Qayumov ishtirokida Fargʻona tumanida navbatdagi yigʻilish boʻlib oʻtdi. Tadbir Oʻzbekiston Respublikasi Prezidentining 2024-yil 6-maydagi “Giyohvandlik vositalari va psixotrop moddalarning noqonuniy aylanmasiga chek qoʻyish orqali aholi salomatligi va mamlakat genofondiga salbiy taʼsirini bartaraf etish strategik chora-tadbirlari toʻgʻrisida”gi PF-73-son Farmoni ijrosi doirasida tashkil etildi.
Yigʻilishda Fargʻona viloyati hokimligi huzuridagi huquqni muhofaza qilish organlari faoliyati, harbiy safarbarlik va favqulodda vaziyatlar masalalari guruhi rahbari, tuman Ichki ishlar boʻlimi boshligʻi, tuman hokimi oʻrinbosarlari, chegaraoldi hududlardagi 25 ta mahalla fuqarolar yigʻinlari vakillari, koʻchaboshilar, nuroniylar, probatsiya nazoratidagi fuqarolar hamda keng jamoatchilik ishtirok etdi.
Tadbir davomida soʻz olganlar yurtimizda olib borilayotgan keng koʻlamli islohotlar va ularning samaradorligini taʼminlashda fuqarolik masʼliyati, ogohlik va yosh avlodni salbiy illatlardan, xususan, giyohvandlik, psixotrop moddalar hamda ruhiy qaramlikdan asrash muhimligini taʼkidladilar.
Shuningdek, Qirgʻiziston bilan chegaradosh hududlardagi nazorat oʻrnatilmagan aylanma yoʻllar orqali noqonuniy yuklar oʻtkazilishi xavfi, bu borada jinoyatchilikni oldini olish choralari, giyohvandlik vositalariga qarshi kurash usullari va ularning natijalari muhokama qilindi. Bu jarayonda mahalla va jamoatchilikning faol ishtiroki alohida ahamiyat kasb etishi taʼkidlandi.
Davra suhbati yakunida aholi vakillarining savollariga mutasaddilar tomonidan atroflicha javoblar berildi. Bildirilgan takliflar joyida muhokama qilinib, masʼul rahbarlarga amaliy choralar koʻrish boʻyicha tegishli topshiriqlar berildi.
Fargʻona viloyati IIB Axborot xizmati