Kursantlar hayotidan. Tajriba maktabi
2025-07-05 08:35:00 / Yangiliklar
Shu kunlarda IIV Akademiyasining bir guruh kursantlari Qashqadaryo viloyati ichki ishlar organlarida amaliyot oʻtamoqda. Shu munosabat bilan dastlab amaliyotni oʻtash jarayoniga bagʻishlangan yoʻriqnoma oʻtkazilib, boshqarma sohaviy xizmatlari va shahar-tumanlarda uzoq yillardan buyon xizmat qilayotgan tajribali xodimlar kursantlarga murabbiy etib biriktirildi.
- Viloyat IIB Kiberxavfsizlik boʻlimida amaliyot oʻtayapman, — deydi IIV Akademiyasi 2-bosqich kursanti Islom Qoʻziyev. — Albatta, nazariy bilimni amaliyotda qoʻllash sohaga oid koʻnikmamni oshiradi. Hali oʻrganishim kerak boʻlgan bilim va tajribalar talaygina. Bu borada murabbiyim, kapitan Akrom Ubaydullayevdan kasb sirlarini oʻzlashtiryapman.
- Birinchi va ikkinchi bosqich kursantlari Akademiyada olgan nazariy bilimlarini mustahkamlash, faoliyatda toʻgʻri qoʻllash, kasb sirlarini puxta oʻrganish uchun amaliyot oʻtamoqda, — deydi IIV Akademiyasi oʻqituvchisi, amaliyot rahbari, podpolkovnik Iskandar Rahmonqulov. — Bundan koʻzlangan asosiy maqsad kursantlarning kasbiy mahorati, jismoniy va jangovar shayligini, xizmatga tayyorgarligini oshirishdir.
Amaliyot — tajriba maktabi. Bu ayni paytda viloyat ichki ishlar organlarida amaliyot oʻtayotgan kursantlarning kasbiy malakasini oshirishda muhim ahamiyatga ega.
Sodiq RAHIMOV, oʻz muxbirimiz.
Qashqadaryo viloyati.