Ichki ishlar organlarida jismoniy tayyorgarlikni oshirish boʻyicha videoselektor yigʻilishi oʻtkazildi
2025-07-04 14:35:00 / Yangiliklar
Ichki ishlar vazirligi rahbariyati huzurida shaxsiy tarkibning jangovar jismoniy tayyorgarligini oshirish, qurol va maxsus vositalardan toʻgʻri foydalanish koʻnikmalarini rivojlantirish chora-tadbirlari yuzasidan videoselektor yigʻilishi oʻtkazildi. Xodimlarning jismoniy tarbiya va ommaviy sport bilan muntazam shugʻullanishi hamda ularning kasbiy tayyorgarlik darajasini yanada mustahkamlash maqsadida, sport (jismoniy tayyorgarlik) mashgʻulotida xodimlarning xizmat vazifalarini bajarish vaqtida oʻzini-oʻzi himoya qilish boʻyicha maxsus jismoniy tayyorgarlik usullarini yetarli darajada oʻzlashtirishi zarurligiga alohida eʼtibor qaratildi.
Shaxsiy tarkibning haftaning belgilangan kunlari jismoniy tayyorgarlik mashgʻulotlariga qatnashishlari ustidan nazorat kuchaytirilib, bu borada barcha darajadagi rahbarlarning “shaxsiy oʻrnak” boʻlishlari asosiy vazifalaridan biri etib belgilandi. Mashgʻulotlar davomida buyruq asosida biriktirilgan jamoatchi instruktorlar tomonidan sportning sambo (qoʻl jangi hamda oʻz-oʻzini himoya qilish usullari), yakka kurash, yengil atletika, kross, suzish, sport oʻyinlari hamda kuch ishlatish boʻyicha amaliy mashqlar tashkil etilib, asosiy eʼtibor mashgʻulotlarni sifatli va samarali oʻtkazilishiga hamda xodimlar tomonidan mashqlarni mukammal oʻzlashtirishlari taʼkidlandi.
IIV JXD Axborot xizmati