O‘zbеkiston Rеspublikаsi Ichki ishlаr vаzirligi

Ishda unum boʻlishi uchun, avvalo, oilada tinchlik, xotirjamlik boʻlishi kerak. Hayotiy muammolarga koʻmilib qolgan insonning ruhiy holati barqaror boʻlmaydi. Shu bois, Guliston shahar IIB boshligʻi oʻrinbosari, mayor Azizjon Gʻiyosov shaxsiy tarkibning oilaviy ahvolini tez-tez oʻrganib, ularning muammolarini hal qilishga intiladi.

U baʼzan olis hududlardagi Sardoba va Oqoltin tumanlariga, hatto Jizzax viloyatining Yangiobod tumaniga borib, xodimlar holidan xabar oladi.

Yaqinda shahar IIB HPB boshligʻi, kapitan Ilyos Muhammadiyev bilan birga Sayxunobod tumaniga yoʻl oldi. Yaʼni, ular Vaqtincha saqlash hibsxonasi inspektori, yosh xodim safdor Farhod Oʻrinboyevning uyiga borishdi. Kattagina hovlida ularni safdorning otasi kutib oldi. Maʼlum boʻlishicha, oʻn besh sotixlar keladigan hovlida uchta oila istiqomat qilar ekan.

Suhbat chogʻida Sayxunoboddan qatnab ishlash xodimga biroz qiyinchilik tugʻdirayotgani, Guliston shahridan uy olish istagida ekani oydinlashdi. Oila aʼzolari bilan maslahatlashgan holda, Farhod Oʻrinboyevga ish joyiga yaqinroq hududdan uy xarid qilish uchun koʻmaklashishga kelishib olishdi. Shu yerning oʻzida telefon orqali mutasaddilar bilan gaplashib, xodimning maʼlumotlarini ijtimoiy himoya reyestriga kiritdi.

Sayxunoboddan chiqib, Guliston tumanidagi “Zarbdor” mahallasiga borishdi. Bu yerda shahar IIB EKB eksperti, kapitan Shoxruh Turdiqulov istiqomat qiladi.

Shoxruh mehnatkash, tirishqoq va masʼuliyatli xodimning bu fazilatlari xonadonidagi obodlikda, fayzda ham koʻrindi. Hamma joyda saranjom-sarishtalik, gullar yashnab turibdi. Xodimning onasi oʻgʻlining hamkasblari soʻrab kelganidan quvondi. Ularni duo qilib, ishlariga omadlar tiladi. Xonadonda xotirjamlik, toʻkislik hukmron edi. Oilada jiddiy muammo koʻtarilmadi. Shu bois rahbarlar bu manzildan koʻngillari xotirjam qaytishdi.

Profilaktika inspektori, leytenant Sherzod Oʻrozboyev shaharning 4-mavzesida istiqomat qiladi. Yaqinda oila qurgan bu xodim ota-onasi bilan birga yashaydi. Xodimning ota-onasi bilan tanishishdi. Baʼmani odamlar ekan. Ushbu oila aʼzolari mayor Azizjon Gʻiyosovda katta taassurot qoldirdi. Ularga mana shunday farzand, yetuk xodimni tarbiyalaganlari uchun minnatdorlik bildirdi.

Oʻzaro suhbatda yangi tushgan kelinni ishga joylashtirish masalasi ham koʻtarildi. Uni yashash manzili-ga yaqin joydagi MTMga tarbiyachi vazifasiga ishga joylashtirishga qaror qilindi. Shu kunning oʻzidayoq tegishli hujjatlar onlayn tarzda rasmiylashtirildi. Boʻsh ish joyi borligi sababli masala ijobiy yechimini topdi.

Soʻnggi manzil shahar IIB HPB inspektori, leytenant Nodir Xudoyberdiyevning uyi boʻldi. Uning farzandlaridan birini, ayniqsa, bahor-kuz mavsumida allergik bronxit kasalligi qiynaydi.

Shifokorlar “Oqtosh” sanatoriysida profilaktik davolanish kursini tavsiya qilishgan. Mayor Azizjon Gʻiyosov rahbariyat bilan kelishib, bu masalani ham hal qildi. Viloyat IIB Tibbiyot boʻlimi, Kasaba uyushmasi koʻmagida bolajon “Oqtosh” sanatoriysiga yuboriladigan boʻldi.

Kechga yaqin ishga qaytarkan, Azizjon har bir xodimning xizmat faoliyatini koʻz oldidan oʻtkazib, atoqli shoirimiz Abdulla Oripovning:

Uyda tinchi boʻlsin yigitning avval,

Soʻngra butun boʻlsin doʻstning iymoni.

Inson yuragini tilkalar azal,

Shu ikki narsaning buyuk armoni,

- degan satrlari bejiz yozilmaganiga yana bir karra amin boʻldi.

Shu bilan birga “xodimbay” ishlash, xodimlar holidan xabar olish nafaqat xizmat burchi talabi, balki oʻzgalarning dardu tashvishiga sherik boʻlish, oʻzaro bir-biriga koʻmaklashish yuk-sak insoniy fazilat ekanini yanada chuqurroq angladi.

Bu shaxsiy tarkibning zimmasidagi ishlarni yanada katta kuch-gʻayrat bilan davom ettirishiga ilhom bagʻishlashidan quvondi.

©️ “Postda” gazetasi, Abdurahmon Mustafoqulov, Sirdaryo viloyati.