Mardlar qoʻriqlaydi vatanni. Surxonning haqiqiy oʻgʻloni
2024-02-27 11:00:00 / Yangiliklar
“Armiya — hayot maktabi” deb bejiz aytishmaydi. Nuriddin Ergashev Xalqaro aeroportlarda xavfsizlikni taʼminlash qoʻshinlariga qarashli 7257-harbiy qismda yigitlik burchini oʻtash davrida oʻzining har tomonlama yaxshi jihatlarini koʻrsatdi.
Avvalambor, namunali xulq-atvorini namoyon etdi. Xizmat vazifalarini sidqidildan ado etdi.
Jangovar tayyorgarlik mashgʻulotlarini puxta oʻzlashtirdi. Ayniqsa, amaliy oʻq otish mashqlarini aʼlo baholarga bajardi. Temir intizomga qatʼiy rioya qilib, komandirlar va boshliqlarning buyruqlarini soʻzsiz bajarib kelmoqda.
Yoshligida milliy kurashga boʻlgan qiziqishi haqiqiy Surxon oʻgʻloniga xosdir. U milliy kurash boʻyicha oʻz vazni toifasida viloyat hokimining bosh sovrindori boʻlgan.
Qahramonimizning otasi Oʻktam aka Qumqoʻrgʻon tumanidagi 14-umumiy oʻrta taʼlim maktabida oʻquvchilarga tarix fanidan saboq beradi, onasi esa uy bekasi.
Undagi mutolaaga qiziqish otasidan oʻtgan. Oʻqigan kitoblari orasida, ayniqsa Oʻtkir Hoshimovning “Ikki eshik orasi” romanini juda yaxshi koʻradi.
Bobosi Ergash ota esa uzoq yillar Qumqoʻrgʻon tumani IIB Tergov boʻlimida samarali xizmat qilib, izzat-ikrom bilar pensiyaga kuzatilgan.
Maqsadim bobomning ishini davom ettirish, — deydi Nuriddin.
Shuning uchun muddatli harbiy xizmatni oʻtab boʻlgach, IIV Akademiyasiga oʻqishga kirmoqchi. Niyating yoʻldoshing boʻlsin, Nuriddin!
Doniyorbek Turgʻunov. II darajali serjant.