Qashqadaryo viloyati IIB rahbariyati ishtirokida “Rahbar va yoshlar” uchrashuvi boʻlib oʻtdi
2025-07-02 11:30:00 / Yangiliklar
Ichki ishlar organlarida “Yangi Oʻzbekiston yoshlari birlashaylik” shiori ostida oʻtkazilgan “Yoshlar oyligi” va “Yoshlar kuni” munosabati bilan viloyat IIB boshligʻi, polkovnik Abduvoxid Ismoilov ishtirokida “Rahbar va yoshlar” uchrashuvi boʻlib oʻtdi.
Tadbirda boshqarma boshligʻi muhtaram Prezidentimiz va IIV tomonidan barcha sohalar qatori ichki ishlar organlari yosh xodimlari uchun ham xizmat sharoitlari, ularning maʼnaviy va intellektual jihatdan rivojlanishi uchun ham yetarli imkoniyatlar va shart-sharoitlar yaratilganini taʼkidladi. Qolaversa, sohada yoshlarga koʻrsatilayotgan yordam va imtiyozlar haqida ham soʻz yuritildi.
Bugungi kunda tizimda oʻz vazifasini bekam-u koʻst bajarib, tashabbuskor, masʼuliyatni oʻz zimmasiga oladigan, jamoat tartibini saqlash, huquqbuzarliklar va jinoyatchilikka qarshi kurashish, sport, ilm-fan, sanʼat sohalarida ham oʻzining beqiyos hissasini qoʻshib kelayotgan yosh xodimlarning soni ortayotganini alohida taʼkidladi.
Bunday gʻamxoʻrliklarga javoban yoshlar hayotda va xizmatda fidoyilik, xalqparvarlik, qonun ustuvorligi, kasbga sadoqat kabi qadriyatlarni oʻzlashtirishi, yosh xodimlarning maʼnaviy-axloqiy ruhiyatini mustahkamlashga xizmat qilish tushuntirildi.
Ochiq muloqot davomida yoshlar oʻzlarini qiziqtirgan savollari va xizmat faoliyati bilan bogʻliq muammolarini bayon qilishdi. Boshqarma boshligʻi har bir savolga toʻliq javob berdi, aniqlangan muammolar yuzasidan esa galdagi vazifalar belgilab olindi.
Shundan soʻng “Yoshlar oyligi” doirasida respublika va viloyat miqyosida oʻtkazilgan maʼnaviy-maʼrifiy koʻrik-tanlovlar hamda sport musobaqalarida yuqori natijalarga erishgan yosh xodimlar va “30 iyun – Yoshlar kuni” munosabati bilan ichki ishlar organlarida yoshlarga oid davlat siyosatini amalga oshirishdagi faol ishtiroki uchun bir guruh xodimlarning ota-onalariga tashakkurnomalar va esdalik sovgʻalari berildi.
Yakunda viloyat Madaniyat boshqarmasining xushovoz xonandasi ijro etgan kuy va qoʻshiq barchaga bayramona kayfiyat baxsh etdi.
Qashqadaryo viloyati IIB Axborot xizmati