Sohaviy xizmatlarda. Samarali tergov natijalari
2025-07-02 08:10:00 / Yangiliklar
Namangan shahar IIB TQX Jinoyat qidiruv boʻlimi xodimlari tomonidan olib borilgan profilaktik tadbir chogʻida, «Sumalak guzari» MFY hududida ketayotgan yangiqoʻrgʻonlik A.I. xodimlarda shubha uygʻotdi. Xolislar ishtirokida tekshirilganida fuqaroning yonidan paket parchasiga oʻralgan toʻq-jigarrang rangli, oʻtkir hidli modda topildi. Viloyat IIB Ekspert-kriminalistika boʻlimi xodimlarining xulosasiga koʻra, mazkur modda 0,95 gramm ogʻirlikdagi opiy giyohvandlik moddasi ekan.
Tergov boʻlimimiz katta tergovchisi, kapitan Ulugʻbek Erkinov tergov jarayonida fuqaroning avval ham giyohvandlik vositalari hamda psixotrop moddalar isteʼmol qilganini aniqladi. Chunonchi, sudga oid narkologik ekspertiza xulosasida I.A. narkologik dispanser hisobida turishi, giyohvandlik moddasi isteʼmol qilishi, majburiy davolanishga muhtojligi koʻrsatilgan. Mazkur holat yuzasidan tergovchi tomonidan jinoyat ishi qoʻzgʻatildi.
Taʼkidlash kerakki, tergovchilarimiz tomonidan yil boshidan buyon 690 dan ortiq jinoyat ishlari tergov qilinib, shundan 270 dan ortigʻi tamomlangan. Tamomlangan jinoyat ishlaridan 98 foizi tegishliligi boʻyicha sudlarga yuborilgan. Shuningdek, 238 dan ortiq jinoyat ishlari ayblov xulosasi va ayblov dalolatnomasi bilan, 32 ta jinoyat ishi yarashuv munosabati bilan ham tegishli tartibda sudlarga taqdim etilgan.
Xodimlarimiz oʻtgan davrda 23 ta jinoyatni fosh etishga, qidiruvdagi 9 nafar shaxsni qoʻlga olishga erishdi. Jabrlanuvchilarga yetkazilgan 13 mlrd 996 mln soʻm miqdoridagi moddiy zararning 13 mlrd 16 mln soʻmi, yaʼni 93 foizi undirildi. Jinoyatlarning oldini olish borasida 266 tadan ortiq taqdimnomalar kiritildi.
Podpolkovnik Bahodir Satimov, mayor Noila Umarxonova, kapitan Abbosbek Polvonov, katta leytenant Nodirbek Mahmudov kabi mahoratli tergovchilarimiz zimmasidagi masʼuliyatli vazifalarni bajarishda namuna koʻrsatib kelmoqdalar.
Ulugʻbek YOQUBOV, mayor.
Namangan viloyati.