Bolaning begonasi boʻlmaydi
2025-06-29 08:25:00 / Yangiliklar
Qarshi tumanidagi 71-maktabda viloyat IIB JXX Huquqbuzarliklar profilaktikasi boshqarmasi tashabbusi bilan sohaviy xizmatlar xodimlari, faxriylar, mahalla faollari, oʻqituvchi va oʻquvchilar ishtirokida maʼnaviy-maʼrifiy tadbirlar oʻtkazildi.
«Dolzarb 90 kun» tadbiri doirasida tadbir avvalida viloyat IIB JXX Yoʻl harakati xavfsizligi boshqarmasi inspektorlari oʻquvchilarga maxsus maydonchada nazariy-amaliy mashgʻulotlar oʻtishdi. Bunda oʻquvchilarning yoʻllarda harakatlanishga oid bilim va koʻnikmasi oshirildi. Soʻng ichki ishlar organlaridagi qurollar koʻrgazmasi tashkil etilib, texnik va taktik xususiyatlari haqida maʼlumot berildi. Xizmat itining buyruqlarni bajarishi, jinoyatni fosh etishi hamda jinoyatchini qoʻlga olishga oid xatti-harakatlari namoyishi oʻquvchilarda katta qiziqish uygʻotdi.
Shundan keyin «Zakovat» intellektual oʻyini, futbol, voleybol, shaxmat va shashka, kurash boʻyicha musobaqalar oʻtkazildi. Musobaqalarda gʻolib boʻlgan oʻquvchi yoshlarga boshqarma rahbariyatining esdalik sovgʻalari va kitoblar topshirildi.
Yakunda sanʼatkorlarning badiiy chiqishlari barchaga xush kayfiyat ulashdi.
Oʻz muxbirimiz.