“Yoshlar oyligi” doirasida Andijon viloyati IIB rahbariyati yosh xodimlar bilan uchrashuv oʻtkazdi
2025-06-27 09:00:00 / Yangiliklar
Andijon viloyati IIB boshligʻi polkovnik Sanjar Djabarov “Yoshlar oyligi” munosabati bilan ichki ishlar organlarida xizmat qilayotgan yosh xodimlar hamda IIV Andijon akademik litsey oʻquvchilari bilan uchrashib, ular bilan samimiy muloqot oʻtkazdi.
Shuningdek yoshlarning taklif hamda mulohazalarini tingladi. Bugun yurtimizda yoshlarga qaratilayotgan eʼtibor va gʻamxoʻrlik bois ertamiz umidlari ilm-fan, madaniyat, sport sohasida mamlakatimiz dovrugʻini yuqoriga koʻtarish maqsadida astoydil harakat qilishmoqda. Bu borada ularga har jabhada yelkadosh rahbarlar borligini alohida taʼkidlash lozim.
Muloqot avvalida soʻzga chiqqan boshqarma boshligʻi ayni kunda yoshlarni har tomonlama qoʻllab quvvatlash ularga zarur shart-sharoitlarni yaratish maqsadida ichki ishlar organlarida qator islohot va tashabbuslar ilgari surilayotgani, oʻz navbatida, sohada kasbiga fidoyi va sadoqatli, yuklatilgan vazifalarni vijdonan bajarib, yuksak natijalarga erishgan koʻplab yosh xodimlar borligini taʼkidlab, ular bilan faxrlanishini bildirdi.
Tashkil etilgan uchrashuv yoshlar tomonidan bildirilgan yangi tashabbus va takliflar bilan yanada qizgʻin oʻtdi. Ayniqsa, yoshlar tomonidan yoʻllangan savollarga boshqarma boshligʻi tomonidan alohida eʼtibor qaratildi.
Taʼkidlash oʻrinliki, ayni kunda viloyat ichki ishlar organlarida xizmat qilayotgan xodimlarning 25 foizini aynan yoshlar tashkil etadi hamda ular har jabhada faol va tashabbuskor.
Ayniqsa sport sohasida qoʻlga kiritilayotgan yutuqlar yil sayin oshib bormoqda.
Yosh xodimlar orasida sogʻlom raqobat muhitini shakllantirish va isteʼdodlarni kashf etishga qaratilgan “Eng faol yoshlar yetakchisi”, “Toʻmaris izdoshlari», “Zakovat”, “Yosh kitobxon”, “Ajdodlar izidan”, “Harbiy estafeta” kabi turli tanlov va musobaqalar oʻtkazib kelinishi esa ulardagi yangi isteʼdod va qobiliyatlarni kashf qilishda asos boʻlib xizmat qilmoqda.
Uchrashuv davomida ana shunday fidoiy va yuqori natijalarga erishgan yosh xodimlar boshqarma boshligʻining tashakkurnoma va esdalik sovgʻalari bilan taqdirlandilar.
Tadbir yakunida yoshlarga xalqimizga sadoqat bilan xizmat qilish oliy burch ekanligi, berilgan vazifalarni masʼuliyat va sharaf bilan ado etish har birimizning insoniylik burchimiz ekani taʼkidlandi.
Andijon viloyati IIB Axborot xizmati